Эрүүгийн цагдаагийн албанаас малын хулгай, цахим гэмт хэрэг, дээрэмдэх гэмт хэрэгтэй холбоотойгоор асуудлаар мэдээлэл хийлээ.

Эрүүгийн цагдаагийн албаны Хулгайлах гэмт хэрэгтэй тэмцэх хэлтсийн дарга, цагдаагийн дэд хурандаа Д.Сандагбалиря “2022 оны эхний гурван сарын байдлаар мал хулгайлах гэмт хэрэг 355 бүртгэгдсэн нь 110 нэгжээр буюу 44.9 хувиар өссөн үзүүлэлттэй байна.

2022 оны эхний улиралд малын хулгайн гэмт хэрэг их гардаг Дундговь, Төв, Дорнод, Хэнтий, Говьсүмбэр, Өвөрхангай зэрэг аймагт дүн шинжилгээ хийж, таван этгээд нэг бүлэг болж, тээврийн хэрэгсэл ашиглаж, дээрх аймаг, сумдын айл, өрхөөс бурхан, судар, ташуур, эмээл, хөөрөг зэрэг эд зүйлийг хулгайлсан байсныг Эрүүгийн цагдаагийн алба болон орон нутгийн цагдаагийн хэлтэс хамтран ажиллаж, хэрэг бүртгэл нээн ажиллаж байна. Тухайн этгээдүүдийн хулгайлсан 68 эд зүйлийг прокурорын зөвшөөрөлтэй хурааж авснаас 30 эд зүйлийн хохирогчийг нь тогтоож, хүлээлгэн өгөөд байна.

               Иргэд малдаа явахдаа ихэвчлэн тээврийн хэрэгслээр явж байгаа учир малын хулгайчдын техник, хэрэгслийг анзаарч, харахгүй байна. Тиймээс ЭЦА-наас малчиддаа уламжлал аргаар морио унаж, малаа хариулж, ойр орчноо дурандаж байхыг анхааруулж байна. Малын хулгайн гэмт хэргийн эсрэг малчид малдаа байршил тогтоогч суулгах, цагдаагийн байгууллагатай байнгын харилцаатай байж, хамтарч ажиллах шаардлагатай байна” гэв.