Ардчилсан намын ээлжит бус Их хурал үргэлжилж байна. 

         Энэ үеэр УИХ-ын гишүүн О.Цогтгэрэл “Ардчилсан намыг 32 жилийн өмнө хэдэн хүн тойрч суугаад байгуулчихсан нам биш ээ. Ардчилсан нам бараг мянганы тэртээх гүрнийг санагалзсан үндэсний их бахархал дээр сүүлийн зуунаар тоологдох жилүүд дээр байгуулагдаж байлаа.  Өнгөрсөн нэг жилийн хугацаанд бид намын гишүүдтэйгээ уулзаж ойлголцлоо. Улс төрийн замналын их биш хугацаа ч гэлээ аз завшаантай хэрэг байлаа. Өнгөрсөн нэг жилийн хугацаанд өөрөөс хамаарах бүхнийг хийхийн тулд урагшаа харж зүтгэлээ Сүүлд явагдсан дотоод сонгуульд би нэрээ татаж авсан. Надад хаана ч, хэнтэй ч өрсөлдсөн  Ардчилсан нам дотор хэнийг ч ялах итгэл үнэмшил байсан. Гэхдээ өмнөх үеийн алдаагаа ойлголцож, эвлэрэх, бүтэн болох гэж ядаж байгаа намд өөрийн жижигхэн орон зайгаа оруулж, би гэж цээжээ дэлдэхийг хүссэнгүй. Зөвхөн би гэдэг үзлээс хол байхыг бодсон юм. Мөн нэр дэвшихгүй гэдгээ илэрхийлэхэд хувь хүний  үзэл бодлыг минь ойлгож хүлээж авсан  ч, "Яагаад нэрээ татчихав" гэж асуух нэгэн байлаа. Мөн зарим нь "Орхиод явчихлаа" гэх гомдол гаргаж байв. Удахгүй ёсчлон батлагдах Ардчилсан намын шинэ дарга намаа нэгтгэж, эв нэгдлээ хангаж 2024 оны сонгуулийн ялалтыг авчрах ерөөл дэвшүүлье” гэв.