Ханш нээх өдөр өнөөдөр тохиож байна. Энэ өдөр монголчууд  буян хийж ном хуруулснаар хийсэн буян арвижин дэлгэрч, эрүүл саруул эд баялгаар арвин байна гэж бэлгэшээж буян үйлдэж ,ичигсэд ичээнээсээ гарч, амьд байгалийн аливаа амьдрал сэргэж хорхой шавж хөдөлдөг  өдөр юм. Энэ өдөр мал,  ичээнээсээ гарсан амьтдын байр байдал, өвс ургамал, тухайн өдрийн цаг агаарын байдлаар хавар, зун ямар  байхыг шинжин тодорхойлдог. Ханш нээх өдөр өмнө зүгээс хур буувал өвс ургамал муу ургаж, үр тарианы ургац муудаж тааламжгүй болно. Энэ цагт булгийн ус задгайран оргилохоос гадна голын мөс ханзарна. Цох хорхой гэнэт олширч энд тэндгүй гүйж харагдвал зун нь хуурай болно хэмээн зөгнөдөг ажээ. Хэрвээ шувуу гол мөрний усанд орвол дулаарахын шинж. Хаврын цас шоргоолжны үүрийн хойд хэсгээс эхэлж хайлбал зуншлага сайхан болж, өв ургамал тэгш ургахын тэмдэг хэмээн үздэг ажээ.

    Иргэдийн дунд ханш нээх өдөртэй холбогдуулан өрөөсгөл ойлголт их  байдаг.  Монгол ёсонд бурхан болоочийн газраа эргэдэг заншил байдаггүй. Мөн иргэд шоргоолж хооллох нь нэг тосгон  хүн ам хооллосонтой тэнцдэг хэмээн үздэг. Иргэд шоргоолж хооллохдоо элсэн чихэр өгдөг гэвч элсэн чихэр хайлж шоргоолжинд наалдаж үхэлд хүргэдэг тул  шоргоолжийг шар тос, арвайн гурилыг багсраад нэг газар ихээр бус тарааж тавьж хооллодог  байна.