Энэ өдрийг дэлхийн хүүхдийн номын баярын өдөр болгон тэмдэглэн өнгөрүүлдэг. Анх 1967 оноос эхлэн Данийн үлгэрийн зохиолч Ханс Кристиан Андерсений төрсөн өдрийг буюу дөрөвдүгээр сарын 2-ныг Олон улсын хүүхдийн номын өдөр болгон тэмдэглэж иржээ. Энэ баярыг дэлхийн хүүхдийн уран зохиолын гарамгай зүтгэлтэн, герман зохиолч, хүүхдийн номын олон улсын зөвлөлийг үндэслэгч Йелла Лепман санаачилж байжээ.

Ханс Христиан Андерсен- Hans Christian Andersen

Ханс Христиан Андерсен  1805 оны дөрөвдүгээр сарын 2-нд төржээ. Ганс хүү 13 настайдаа дуучин болох их хүслээр нийслэл Копенгаген хотод ирсэн боловч зорьсон хэрэг нь бүтсэнгүй, дунд сургуульд орж дараа нь Копенгагены их сургуульд дэвшин суралцжээ. Тэрээр 25 наснаас утга зохиолын ажил дагнан оролдож эхлэх зуур, Европын олон орноор жуулчлан явж ард түмний аж амьдрал, аман зохиолын гайхамшигтай танилцсан нь түүний ертөнцийг үзэх үзэл бүрэлдэн тогтож уран зохиолч болоход чухал нөлөө үзүүлжээ.  Х.  Андерсен эхлээд уран зохиолын бүх төрлөөр бичиж авьяас билгээ сорьсон боловч түүнийг олонд нэрд гаргасан нь гагцхүү үлгэр, түүх болно.  «Хүүхдүүдэд ярьж өгөх үлгэрүүд», «Шинэ үлгэрүүд», «Түүх», «Шинэ үлгэр ба түүх» зэрэг бүтээл нь дэлхий дахинд түүний нэрийг алдаршуулжээ. Түүний бүтээлүүд дэлхийн 150 гаруй хэлээр орчуулагдсан байдаг бөгөөд зохиолуудаас нь сэдэвлэсэн хүүхэлдэйн кино, уран сайхны кино, бүжгэн жүжиг зэрэг багтдаг.
 

О.Эрдэнэтунгалаг