Засгийн газрын хуралдаанаас гаргасан шийдвэрийн талаар Эрчим хүчний сайд Н.Тавинбэх мэдээлэл хийлээ.

Тэрбээр “Улаанбаатар хотод явж байгаа нийт суудлын тээврийн хэрэгслийн 20-30 хувьд нь цахилгаан автомашин нэвтрэхэд цахилгаан эрчим хүчний хэрэглээ 15-20 хувь нэмэгдэнэ. Нэмэгдэх эрчим хүчийг оргил цагуудаас бусад үед цэнэглээд явах бүрэн боломжтой гэсэн тооцоо судалгааг гаргасан. Өдрийн байдлаар цахилгаан автомашиныг 150 төгрөг байгаа. Үүнээс гадна цэнэглэх тоног төхөөрөмж, суурин станц наймыг бий болгосон байна. Эдгээр газруудад 300-1000 төгрөгөөр эрчим хүчийг борлуулж байна.  Үүнээс гадна Эрдэнэ- Бүрэнгийн усан цахилгаан станц баригдаж ашиглалт орвол ногоон бүсээр баруун аймгуудын эрчим хүчийг дотоодоос хангах боломжтой болно. Энэ станцыг бүтээн байгуулах бүх ажил бүрэн хангагдсан. Ганцхан хүндрэлтэй асуудал гарч байгаа нь нөлөөлөлд автсан иргэд байгаа. Нөлөөлөлд автсан иргэд гэж хэнийг хэлж байна гэхээр усан цахилгаан станц баригдахтай холбоотой шинээр бий болох усан сангийн газарт ажиллаж амьдарч байгаа нутгийн иргэд, малчид, тариаланч 270 өрх бий.  Эрх зүйн зохицуулалтаар нөлөөлөлд автсан иргэдэд зөвхөн үндсэн хөрөнгийн үнэлгээ хийж нөхөн олговор өгч байна. Засгийн газрын хуралдаанаар бид энэ иргэдийн нөхөн олговрыг нэмэгдүүлэх талаар хэлэлцэж байгаа. Мөн биет болон биет бус өвийг үнэлэх талаар эрчим хүчний яам тодорхой асуудал боловсруулаад ерөнхий сайдад өргөн барьсан. Эрх засгийн газрын хуралдаанаар эцэслэн шийдэх байх" гэлээ.