“Монголын эдийн засгийн форум-2022” арга хэмжээний хүрээнд Монгол Улсын Ерөнхийлөгчийн ивээл дор “Ногоон санхүүжилт бүс нутгийн чуулган” өнөөдөр Төрийн ордонд үргэлжилж байна. “Ногоон хөгжлийн сэргэлт-Ногоон санхүүжилт” сэдвийн хүрээнд энэ удаагийн чуулган зохион байгуулагдаж буй бөгөөд Санхүүгийн зохицуулах хорооны дарга Д.Баярсайхан “Тогтвортой санхүүжилтийн замын зураг” хэлэлцүүлэгт оролцож зохицуулалтын санхүүгийн салбаруудад хийж буй ногоон санхүүжилтийн ажлуудаа танилцууллаа.

   Санхүүгийн зохицуулах хороо зохицуулалттай этгээдүүдэд БОНЗ-ын тайлагналын стандартыг нэвтрүүлэх, ногоон санхүүжилтийн эх үүсвэрийг нэмэгдүүлэх чиглэлд анхаарч ажиллаж ирсэн. Тухайлбал, хөрөнгийн зах зээлээс байгаль орчинд ээлтэй үйл ажиллагаа явуулахад шаардлагатай хөрөнгө оруулалтыг татах буюу ногоон бонд гаргахад шаардлагатай эрх зүйн орчныг бүрдүүлсэн. Мөн нээлттэй хувьцаат компаниудыг байгаль орчин, нийгэм, засаглалын тайлан гаргаж мэдээлдэг болох зохицуулалтын өөрчлөлт хийхээр ажиллаж байгаа билээ. Харин даатгалын салбарын хувьд байгаль орчинд ээлтэй бүтээгдэхүүн, үйлчилгээтэй холбоотой тодорхой даатгалын бүтээгдэхүүнүүдийг бий болгох эрх зүйн орчныг бүрдүүлэхээр ажиллаж байна.

  Энэ хүрээнд ногоон даатгалын бүтээгдэхүүнийг тодорхойлж, уг төрлийн даатгалын бүтээгдэхүүнийг тусад нь бүртгэх, ногоон даатгалын үйл ажиллагааны дэлгэрэнгүй тайлан гаргаж олон нийтэд мэдээлдэг болгох, даатгуулагч нарт бусад даатгалын бүтээгдэхүүнтэй харьцуулахад тодорхой хөнгөлөлт, урамшуулалтай байх зэрэг зохицуулалтыг тусгаж баталсан. Түүнчлэн банк бус санхүүгийн байгууллагын салбарын хувьд харилцагчдынхаа байгаль орчин, нийгэмд үзүүлж буй эрсдэлийг үнэлэх, түүгээр дамжуулан ногоон санхүүжилтийн эх үүсвэрийг нэмэгдүүлэх чиглэлээр оролцогч талуудын чадавхийг бэхжүүлэх, байгаль орчин, нийгэмд үзүүлж буй нөлөөллийн үнэлгээний зохицуулалтын өөрчлөлтийг боловсруулж байна. Мөн хэлэлцүүлгийн үеэр Санхүүгийн зохицуулах хорооны Үнэт цаасны газрын дарга Б.Дөлгөөн “Тогтвортой санхүүжилтийн үндэсний замын зураг”-ийн танилцуулгыг хийсэн юм.

  Хэлэлцүүлгийн төгсгөлд Санхүүгийн тогтвортой байдлын зөвлөлийн гишүүн байгууллагууд болох Санхүүгийн зохицуулах хороо, Сангийн яам, Монгол банк, хадгаламжийн даатгалын корпорацийн удирдлагууд “Тогтвортой санхүүгийн үндэсний замын зураг”-ийг баталлаа. Ингэснээр 2030 он гэхэд хүлэмжийн хийн ялгарлыг 22.7 хувиар бууруулах, уур амьсгалын өөрчлөлтөд дасан зохицох, Тогтвортой хөгжлийн зорилтуудыг биелүүлэхэд 2030 он хүртэл нэмэлтээр санхүүжилтийн эх үүсвэрийг бүрдүүлэх боломж бий болно. Санхүүгийн зохицуулах хорооны хувьд  “Тогтвортой санхүүжилтийн үндэсний замын зураг”-т тусгагдсан томоохон ажлын нэг нь банк бус санхүүгийн байгууллагуудын нийт зээлд эзлэх ногоон зээлийг таван хувьд хүргэх зорилтыг тусгаж, холбогдох арга хэмжээг авч хэрэгжүүлэхээр төлөвлөжээ.