Хөгжлийн банкны асуудалтай  холбоотой цаг үеийн нөхцөл байдлын талаар Хөгжлийн банкны дэд захирал Ж.Эрхэмбаатар мэдээлэл өглөө. Тэрбээр “ Ажлын хэсгийн дүгнэлтэд Хөгжлийн банк мэдээлэл өгч, ажиллаж байгаа. Өнгөрсөн хугацаанд үндэсний аудитын газар Монгол банкнаас гаргаж байсан дүгнэлтүүдтэй давхцаж байгаа нь гарсан алдаа засагдахгүй байна гэсэн үг. Үүнийг заавал засах ёстой. Тийм учраас УИХ нээлттэй сонсгол хийж, холбогдох шийдвэр гаргаж, хууль, эрх зүйн орчныг нь өөрчлөх, Хөгжлийн банкны засаглалыг сайжруулах, зээлдэгчид тавих хяналтыг сайжруулах зэрэг хуулийн менежментийг сайжруулах арга хэмжээ авахаар ажиллаж байна. Хөгжлийн банкны тухай хууль 2011 онд батлагдсан. Тухайн үед Хөгжлийн банк хоёр хуулийн хүрээнд ажиллаж байсан. Тэр үед хууль, эрх зүйн орчин муу байгаагүй. Харин хуулийг хэрэгжүүлээгүй. Хэрэгжүүлэх нэрийн дор хэлбэр төдий хэрэгжүүлээд тодорхой зээлийн шаардлагыг хэлбэр төдий бүрдүүлж зээл олгож  байсан.  Тэгэхээр хуулийн хүрээнд ажиллаагүйгээс өнөөдрийн эрсдэл бий болсон гэсэн үг.  Мөн зарим ажилчид олон жил  ашиг сонирхлын зөрчилтэй байснаас дээрх асуудал үүссэн. Хөгжлийн банкны зүгээс ямар нэгэн аж ахуйн нэгжийн үйл ажиллагааг зогсоогоогүй. Ийм эрх бидэнд байхгүй. Шүүхэд өгсөн зээлдэгч нарын барьцаа хөрөнгийг хамгаалалтад авсан. Хамгаалалтын арга хэмжээ авах нь зайлшгүй чухал гэж үзсэн. Учир нь барьцаа хөрөнгөө устах, хуурамч этгээд рүү шилжүүлэх, алга болох зөрчлүүд гарч байгаа. Бидэнд байгаа мэдээллээр АТГ-аас шалгаж буй Эрүүгийн хэрэг хянан шийдвэрлэх ажиллагааны хүрээнд гэмт хэргийн шинжтэй хэргийг төлүүлэх зорилготой иргэн, аж ахуйн нэгжийн дансыг битүүмжилсэн. Ажлын хэсгийн шалгалтын үр дүнд улс төрчдийн  22 компанийн нэрийг зарласан. Манай бүртгэлээр “Чанаргүй, хэвийн ” гэх ангилалд орсон зээл байна. Хөгжлийн банкнаас  хэн нэгэн улс төрчийн нөлөөнд автаж зээл олгосон эсэхийг хуулийн байгууллага шалгана” гэв.