Эргэлт.мн мэдээллийн сайт “Ажлын ширээ” булангийнхаа  энэ удаагийн дугаарт та бидний байнгын хэрэглээ, амьдралын салшгүй нэг хэсэг болох хувцсыг урладаг эрхмүүдийн төлөөллийн ажлын ширээг танилцуулж байна. Энэ дугаарт бид  “Mon Petit” хүүхдийн хувцасны брэндийн эсгүүрчин, оёдолчин Б.Бүжин, 30 жилийн турш оёдлын газар ажиллуулж байгаа Д.Нацаг, “EV” үндэсний хувцасны салоны үүсгэн байгуулагч  дизайнер, оёдолчин Т.Нэргүй, эсгүүрчин Ц.Хулан нарыг онцлон, хэрхэн өөрт тухтай орчин бүрдүүлэн ажилладагийг танилцуулж байна.

МИНИЙ АЖЛЫН ШИРЭЭН ДЭЭР ШУГАМ ХАРАНДАА ЗААВАЛ БАЙДАГ

 

“Mon Petit” хүүхдийн хувцасны брэндийн эсгүүрчин, оёдолчин Б.БҮЖИН

             Эсгүүрчин хийгээд нэг жил болж байна. Ажлын ширээгээ хэтэрхий эмх замбараатай байлгах гэж оролддоггүй. Хэтэрхий их эмх замбараатай байхаар угаасаа ашиглагдах багаж хэрэгсэл учраас наана цаана нь орчихдог. Тийм болохоор гарт ойрхон, нүдэнд ил байвал зүгээр, хүмүүст бол замбараагүй харагдаж болох ч би ойлгож байвал болно гэж боддог. Эсгүүр хийж байхад томьёо харах хэрэгтэй гэтэл янзалсан цаасны  доор орчихсон байвал би олохгүй шүү дээ. Юм хайхгүй хурдаг шаламгай хийх ёстой учраас миний мэддэг газарт  эд зүйлс маань байвал надад ажиллахад тухтай байна.  Миний ширээн дээр шугам, харандаа заавал байх ёстой. Оёдлын машины ширээн дээр утас таслагч, шохой заавал байдаг.Оёдолчны ширээн дээр хоол ундны зүйлс байвал бүтээгдэхүүнээ муухай болгох эрсдэлтэй учраас аяга, таваг оёдлын ширээн дээр тавьдаггүй.

 

ХАЙЧНЫ ЖИНХЭНЭ ӨНГИЙГ АРИЛТАЛ 30 ЖИЛ АШИГЛАСАН 

 

Хувиараа бизнес эрхлэгч, хувцас урлаач Д.НАЦАГ

           Би 30 гаруй жил оёдолчин хийлээ. Энэ хугацаанд олон төрлийн хувцас оёсон байна. Миний ажлын ширээн дээр оёдлын машин, оёдлын утас, ханзлагч, таслагч, шугам, эсгүүрийн саван зэрэг байнга байдаг. Өөр нэг чухал, дотны найз минь хайч. Миний хайч надтай бараг 30 гаран жил "ажиллаж" байна. Өнгө нь арилаад, хайчаа ирлүүлсээр байгаад богино болчихсон. Одоо бол эрэгтэй монгол цамцны эсгүүр гаргаж байна. Олон жил оёдолчин хийж байгаа учраас байнгын үйлчлүүлэгч олонтой.

ДИЗАЙНЕР ХҮН ОЁДЛЫН ЯВЦЫН ТАЛААР БҮРЭН МЭДЛЭГТЭЙ БАЙХ ХЭРЭГТЭЙ 

 

“EV brand” үүсгэн байгуулагч дизайнер, оёдолчин Н.НЭРГҮЙ

           Хувцас урлаад арван жил болж байна. “EV” брэндийг 2017 онд үүсгэн байгуулсан. Үндэсний хувцсыг дагнан үйлдвэрлэж байгаа. Одоо яг  үйл ажиллагаа маань жигдэрч байна даа. Миний ширээн дээр “Монгол угсаатны хувцас, урлагийн түүх” гэсэн ном маань үргэлж байдаг. Үндэсний хувцас гэдэг маш өргөн цар хүрээтэй, тиймээс санаа сэдэл авах тохиолдол олон гардаг. Миний ширээний ном гэх юм уу даа. Би бүх юмаа буулгаж тавьж, байгаад ажлаа хийдэг замбараагүй талдаа /инээв/.Ажил маань тэгж замбараагүй байх шаардлага гаргадаг. Жишээ нь, хайчаа нэг ашиглачихаад буцааж шүүгээнд хийгээд дахиад гаргаад байвал цаг их алдана. Дизайнер хүн ганцхан загвараа гаргаад яваад байж болохгүй. Эсгүүрээс эхлээд бүрэн бүтээгдэхүүн, хувцас болох хүртэл үйл явцыг мэддэг байх хэрэгтэй. Учир нь, би мэдэхгүй байвал хувцас болох боломжгүй загвар гаргана гэсэн үг. Манай бүтээгдэхүүний онцлог гэвэл ямар ч хувцсыг урлаг тал руу нь илүү оруулахыг хичээдэг. Энгийн цагаан даавуу байсан ч өөрсдөө будаж, зураг зурсан даавуугаар дээлээ оёдог.

ШИРЭЭН ДЭЭРЭЭ ХЭРЭГГҮЙ ЗҮЙЛ БАЙЛГАДАГГҮЙ 

"EV" брэндийн эсгүүрчин Ц.ХУЛАН

         Арван жил хувцас эсгэж байна. Өөрөөр хэлбэл, эсгүүрчин болоод 10 гаруй жил болсон гэсэн үг. Ширээгээ эмх цэгцтэй байлгахыг хичээдэг. Тооны машин, хайч, шугам, метр гээд  ажилд хэрэгцээтэй гар доорх багажууд байдаг. Кофены аяга ойрхон байвал надад таатай байдаг. Ажлын хажуугаар шинэ санаагаа бодож сэтгэх үедээ аяга кофе уугаад толгойгоо сэргээх хэрэгтэй.Үлдсэн хэрэгцээтэй зүйлсээ арын шүүгээндээ байршуулдаг.

О.Эрдэнэтунгалаг