Дэлхий нийтээр гуравдугаар сарын 22-ны өдрийг “Дэлхийн усны өдөр” болгон тэмдэглэн өнгөрүүлдэг. Анх 1992 онд Нэгдсэн Үндэстний Байгууллагын Хүрээлэн буй орчин, Хөгжлийн тухай олон улсын хурлын (UNCED) үеэр дэлхийн усны тэмдэглэлт өдөртэй болох саналыг дэвшүүлсэн байна. Улмаар 1993 оны гуравдугаар сарын 22-ны өдрийг анх НҮБ-ын Ерөнхий Ассамблейгаас “Дэлхийн усны өдөр” болгон зарлан тунхаглажээ. Монгол Улсын Засгийн газар 2005 оноос хойш “Дэлхийн усны өдөр”-ийг уламжлал болгон тэмдэглэж ирсэн.

Жил бүрийн энэ өдрөөр цэвэр усны тухай тодорхой онцлог сэдвийг хөндөн олон нийтэд тайлбарлан таниулж байдаг.

Усны тухай арван сонирхолтой баримт

1.    500 гр кофег боловсруулахын тулд ойролцоогоор 11 литр ус ашигладаг.
2.    Дэлхийн усны нийт хэрэглээний 70 хувийг хөдөө аж ахуйн салбарт зарцуулдаг  бол 20 хувийг үйлдвэрлэлд ашигладаг аж.
3.    Уснаас үүдэлтэй өвчин гарсны улмаас  жил бүр 443 сая хичээлийн өдөр завсарддаг байна.
4.    Нэг кг будааг боловсруулахад 5000 хүртэлх литр ус хэрэглэдэг.
5.    Суултуурын усыг нэг удаа татахад ойролцоогоор  найман литр ус урсдаг.
6.    Нэг өдрийн сонин хэвлэхэд хэрэглэгдэх цаасыг гарган авахын тулд 300 литр ус ашигладаг.
7.    Усны хангамж дутмагаас 2.6 тэрбум хүн бохир орчинд амьдарч байна.
8.    18 литрээр савласан ус 20 кг жин татдаг.
9.    Америк өрхийн усны хэрэглээг Энэтхэг өрхийн усны хэрэглээтэй харьцуулахад найм дахин их байдаг аж.
10.    Хамгийн их ус мөсөн голуудад бий.

Усаа хэмнэж болох санаанууд

1.    Шүдээ угаасны дараа амаа зайлахдаа аяга ус хэрэглэж заншвал та жилд 9100 литр ус хэмнэх болно.
2.    Өндөг чанасан усаараа цэцгээ усалж  бай. Өндөгний  хальсны минералууд цэцэгт сайн нөлөөтэй.
3.    Суултуур болон угаалтуурт том хэмжээний хог хаягдал хийхгүй байх. Урсах боломжгүй том хог хаягдлыг бохирын шугамд хийснээр шугам бөглөрч бусад айл өрхийн угаалтуур, суултуураар бохир хальдгийг анхаарах.
4.    Та цэцэрлэгээ өглөө эрт усалж заншсанаар ус удаан хугацааны турш ууршихгүй. Мөн аль болох хуурай нөхцөлд тэсвэртэй ургамал сонгохыг зөвлөж байна.
5.    Зүлэг ногоо услахдаа хоолой биш усалгааны сав ашигла. Өглөө эрт, эсвэл оройдоо услах нь ус ууршихаас сэргийлж, хэмнэлт үүсгэнэ.