Дархан-Уул аймгийн онцгой комисс гуравдугаар сарын 14-ний 18:00 цагийн хуралдаанаар  бага насны /0-5/ хүүхдүүдийн дунд амьсгалын замын өвчлөл их байгаа тул мэргэжлийн байгууллагуудын дүгнэлт, саналыг үндэслэн СӨББ-ын үйл ажиллагааг гуравдугаар сарын 15-наас эхлэн 14 хоног түр зогсоохоор шийдвэрлэлээ.

  Риновирусын гаралтай томуу томуу төст өвчин хүүхдүүдийн дунд эрчимтэй нэмэгдэж нийт хүүхдүүдийн 14.71 хувь нь амьсгалын замын өвчлөлд өртсөн судалгааг ЭМГ-с өгч байна. Энэ нь алаг цоогоос аймгийн хэмжээний дэгдэлттэй буюу томуугийн таван үе шатны дөрөв дэх шатанд орсон гэсэн үг.

  Өнгөрсөн долоо  хоногт амбулториор дунджаар 160 орчим хүүхэд үзүүлсэн. 0-9 насны хүүхдүүд 80 орчим хувийг эзэлж байна. Иймээс гуравдугаар сарын 28 ны өдрийг хүртэл цэцэрлэгийн үйл ажиллагааг түр хязгаарлаж байна.

• Нэгдсэн эмнэлэгт  нэмэлт ор дэлгэж 164 хүүхэд хэвтэх боломжийг бүрдүүлсэн. Одоогоор 124 хүүхэд эмчлүүлж байна.
• Шаардлагатай тохиолдолд нэмж ор дэлгэх боломжийг бүрдүүлэх зорилгоор 2-р төв, ахмадын төвд нийт 80 ор бэлдэх үүрэг өгсөн.
• Бүх цэцэрлэгүүдийн ариутгал халдваргүйтгэлийг зохион байгуулна.
• Яаралтай түргэн тусламж 103-ын тусламж үйлчилгээг хоёр  машинаар нэмэгдүүллээ.
• Тэтгэвэрт байгаа эмч нар болон хувийн хэвшлийн эмч нарыг татан ажиллуулах үүргийг өглөө.
• Нэгдсэн эмнэлэг, ӨЭМТ-д уртасгасан цагаар ажиллаж байна.
• Маргаашнаас хоёр дугаар төвд хүүхдийн үзлэг хийгдэнэ.

Энэхүү шийдвэртэй холбогдуулж 0-5 настай хүүхэдтэй эцэг эхчүүдийг шаардлагатай тохиолдолд цахимаар зайнаас ажиллуулах боломжийг бүрдүүлэн өгөх үүргийг мөн өглөө.