Олимпын аварга Н.Түвшинбаяр 2021 оны дөрөвдүгээр сарын 3-нд Улсын начин Э.Энхбатыг зодож, хүнд гэмтэл учруулсны улмаас нас барсан билээ. Түүнийг өнгөрсөн хугацаанд сэжигтнээр татаж, хэдэн сараар цагдан хоригдож буй. Түүний сүүлчийн цагдан хоригдож буй хугацаа дуусаж байгаа билээ.

     Тодруулбал, Хан-Уул дүүргийн Эрүүгийн хэргийн анхан шатны шүүх тус дүүргийн прокурорын газраас ирүүлсэн Н.Түвшинбаярын цагдан хорих 3 дугаар хугацааг сарын хугацаагаар сунгуулах тухай саналыг 2022 оны хоёрдугаар сарын 10 -ны өдөр хүлээн авч, 2022 оны хоёрдугаар сарын 11-ний өдөр дүүргийн прокурор, яллагдагчийн өмгөөлөгч нарыг оролцуулан хянан хэлэлцээд Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 2 дахь хэсэгт заасан “Эрүүгийн хуулийн тусгай ангид хорих ялын доод хэмжээг найман жил түүнээс дээш хугацаагаар оногдуулахаар заасан гэмт хэргийн яллагдагчийн хувийн байдал, үйлдэгдсэн гэмт хэргийн шинжийг харгалзан Эрүүгийн хэрэг хянан шийдвэрлэх ажиллагааны зорилтод нийцүүлэн цагдан хорих таслан сэргийлэх арга хэмжээ авч болно” гэсэн заалт, мөн хуулийн 14.10 дугаар зүйлийн 2 дахь хэсэгт заасан “Хэргийн ээдрээ төвөгтэй байдлыг харгалзан яллагдагчийг цаашид цагдан хорьж болно” гэсэн хуулийн заалтуудыг тус тус үндэслэн цагдан хорих 3 дугаар хугацааг нэг сарын хугацаагаар сунгаж шийдвэрлэсэн байдаг. Тэгвэл түүнийг үргэлжлүүлэн хорих эсэх талаар дахин шүүх хурал болох аж.