Гаалийн Ерөнхий газрын Зөрчилтэй тэмцэх, хэрэг бүртгэх албаны дарга Б.Сүхбаатар цаг үеийн асуудлаар мэдээлэл өглөө.

  Тэрбээр “Гаалийн байгууллагын нэг үндсэн чиг үүрэг бол улсын хилээр нэвтрэх, хориглосон, хязгаарласан барааны хууль бус хяналттай тэмцэх юм. Өөрөөр хэлбэл, Монгол Улсын үндэсний аюулгүй байдлыг сахин хамгаалах үүрэгтэй. Энэ хүрээнд өнгөрсөн оны наймдугаар сараас хойш 4-5 удаагийн мансууруулах бодис хууль бусаар нэвтрүүлэхийг завдсан тохиолдлыг илрүүлсэн. Мөн өнгөрсөн оноос эхлэн үргэлжилж байгаа Монгол Улс руу сүүлийн үед үйлдвэрлэгдсэн, хүчтэй үйлчилгээтэй шинэ төрлийн мансууруулах бодис, хууль бусаар нэвтрүүлж байж болзошгүй үйл ажиллагааг Гааль, Хууль сахиулах байгууллагын хамтарсан байдлаар илрүүлж, шалгаж байгаа. Гаалийн байгууллагаас иргэн Ю-гийн бүрдүүлэлт хийж байгаа ачаанаас алт, үнэт эдлэл илэрсэн гэсэн нарийвчилсан үзлэг хийгээгүй, хоёрдугаарт  хяналт, шалгалт одоогоор дуусаагүй байгаа. Эхний  байдлаар багагүй хэмжээний татвараас зайлсхийж Гаалийн байгууллагад барааг худал мэдүүлсэн зөрчил илэрсэн байгаа. Энэ бүх үйл ажиллагаа дууссаны дараа бид тодорхой мэдээлэл өгнө” гэв.

  Мөн тэрбээр үргэлжлүүлэн “Өнгөрсөн хугацаанд илрүүлсэн гэмт хэргийн шинжтэй хэргүүдээс харж байхад 95 хувь нь Монгол Улсын иргэн байна. Үүний 4-5 хувьд нь гадаад улсын иргэн холбогдсон байна. Сансар супермаркетийн тортой холбоотой асуудал бол тухайн үйл ажиллагаа эрхэлж байгаа аж ахуй нэгжтэй холбоогүй асуудал.  Үүнийг харин Монгол Улсын хилээр оруулж ирэхдээ  тухайн зорчигч өөрөө хувийн эд зүйлдээ байсан тор, сав баглаа боодлоор алт, үнэт эдлэлээ боож, ороосон асуудал гарсан байгаа юм. Үүнийг харин галийн үзлэг шалгалт хийх явцад бэхжүүлж авсан" гэлээ.