Улсын бүртгэлийн ерөнхий газраас өнөөдөр цаг үеийн асуудлаар мэдээлэл хийлээ.

   Энэ үеэр тус газрын дарга Д.Дэлгэрсайхан “Монгол Улсын Засгийн газрын 2020-2024 оны үйл ажиллагааны хөтөлбөрийг хэрэгжүүлэх арга хэмжээний төлөвлөгөөнд тусгагдсан “Улсын бүртгэлийн цахим үйлчилгээг өргөжүүлнэ” гэх заалт бий. Энэхүү ажлын хүрээнд болон Ухаалаг засаг төрийн дэмжлэгтэйгээр Төрийн цахим үйлчилгээний нэгдсэн систем буюу e-mongolia.mn сайтаар дамжуулан Улсын бүртгэлийн ерөнхий газраас 22 төрлийн лавлагаа, 50 төрлийн үйлчилгээ үзүүлж байна. Үүнээс иргэний улсын бүртгэлийн 26 нэр төрлийн үйлчилгээ, 12 төрлийн лавлагаа, хуулийн этгээдийн улсын бүртгэлийн 13 төрлийн үйлчилгээ, долоон төрлийн лавлагаа, эд хөрөнгийн эрхийн улсын бүртгэлийн есөн төрлийн үйлчилгээ, гурван төрлийн лавлагааг тус бүр цахимаар үзүүлж байна. Эдгээрээс 27 нь шуудан хүргэлтээр хийгдэж байгаа юм” гэв.

  Тэрбээр үргэлжлүүлэн “Одоогоор бид төрийн цахим үйлчилгээний нэгдсэн e-mongolia.mn системээр дамжуулан иргэний улсын бүртгэлийн 31.325, хуулийн этгээдийн улсын бүртгэлийн 20.124, эд хөрөнгийн эрхийн улсын бүртгэлийн 142.098.557 лавлагаа, нийт 2.150.020 лавлагаа, үйлчилгээг тус иргэн, хуулийн этгээдэд үзүүлээд байна. Ингэснээр, цахим үйлчилгээ нэвтэрснээр нийт 30.0 тэрбум төгрөгийн зардал хэмнэгдсэн байна. Мөн шуудан хүргэлтээр нийт 90 иргэн, хуулийн этгээдэд үйлчилгээ үзүүллээ” гэсэн юм.

Улсын ерөнхий бүртгэлийн газраас цаашид үйлчилгээний нэр төрлийг нэмэгдүүлж, шинээр 50 төрлийн үйлчилгээ болон 38 шуудан хүргэлтийн үйлчилгээг нэвтрүүлэхээр ажиллаж байгаа бөгөөд шилжилт хөдөлгөөнтэй холбоотой бүртгэлийг мөн e-mongolia.mn системд оруулахаар ажиллаж байна. Мөн барьцаа хөрөнгө авах цэсийг мөн тус системд дөрөвдүгээр сар гэхэд оруулна гэв. Түүнээс гадна иргэд хурууны хээ биш зөвхөн тоон гарын үсэг ашиглаж үйлчилгээ авна гэдгийг мөн онцоллоо.