Булган аймгийн Соёл урлагийн хэлтсийн дарга, СТА О.Ууганчимэг нэгэн тоглолтын үеэр дуучин С.Нинжингийн “Амин хайртай нутаг” дууг ам барьж дуулсан бичлэг олон нийтийн сүлжээгээр цацагдсан билээ. Энэ талаар дуучин С.Нинжин цахим хуудастаа “Булган аймгийн Соёл урлагийн хэлтсийн дарга, СТА О.Ууганчимэг миний дуулсан дуун дээр ам барьчихсан байна. Одоо бүр хүний дуун дээр ам барьдаг болж” хэмээн бухимдлаа илэрхийлсэн байдаг. Мөн албан ёсоор уучлалт гуйхыг нь хүлээж буй тухайгаа цахим хуудсаараа мэдэгдсэн билээ. Тэгвэл ам барьсан гэгдэж буй О.Ууганчимэг дуучин С.Нинжингээс албан ёсоор уучлалт гуйжээ.

     Энэ тухай С.Нинжин цахим хуудастаа “Миний хоолойн дээр өөр хүн ам барьж байхыг үзэх ёстой эвгүй байлаа. Чи хоолойгоо таньдаггүй юм уу гэхээр бүр дургүй хүрдэг юм байна. Одоо нэрийг нь бичээд яах вэ.  Над руу залгаж уучлалт гуйлаа, ойлголцлоо. Уг нь эрт ойлголцчих л байсан юм. Надад уучлах сэтгэл их байлаа.  Даанч миний олон сарын хүч хөдөлмөр, хөрөнгө мөнгөө зарцуулж чадан ядан хийсэн уран бүтээл шүү дээ. Дээрээс нь  доромжлуулж байсан болохоор яаж ч чадсангүй. Гэхдээ ийм алдаа гаргаж болохгүй гэдгийг олон хүнд сануулсан байх” хэмээн бичжээ.