ӨДРИЙН СУРВАЛЖИЛГА: Усны төлбөрийн нэмэгдэл иргэдийн амьдралд

2022-03-09, 1353

-Энэ оны нэгдүгээр сарын 1-ний өдрөөс ахуйн болон албан байгууллагын хэрэглээний усны төлбөрийг нэмэгдсэн үнээр тооцож эхлээд байгаа юм-

Тодруулбал, Төрийн болон орон нутгийн өмчийн тухай хуулийн 20 дугаар зүйл, Хот, суурины ус хангамж, ариутгах татуургын ашиглалт, үйлчилгээг зохицуулах зөвлөлийн өнгөрсөн оны долоодугаар сарын 21-ний 78 дугаар тогтоолын дагуу Ус сувгийн удирдах газар 2022 оны нэгдүгээр сарын сарын 1-нээс усны үйлчилгээний үнэ тарифын өөрчлөлтийн дагуу төлбөрийг нэмсэн.

Дээрх шийдвэр гарснаар гэр хорооллын айлуудын усны төлбөр нэг төгрөг байсныг хоёр төгрөг болгож орон сууцны айлуудын хэрэглээний усны үнийг 71 мөнгө байсныг нэг төгрөг долоон мөнгө болгосон. Үүнтэй холбоотойгоор бид энэ удаад усны төлбөр нэмэгдсэнээр ямар үр дагавар гарч буйг сурвалжиллаа.

Баянгол дүүргийн оршин суугч Ү.Цэнджав “Манайх гурван өрөө байранд амьдардаг. Усны төлбөр нэмэгдсэн нь өнгөрсөн жилүүдийн төрөөс төлсөн төлбөрийг иргэдээр төлүүлэх зорилготой гэж бодож байгаа. Үнэхээр ард иргэдээ дэмждэг бол яагаад нэмэх ёстой юм. Янз бүрийн байр суурьтай хүмүүс өчнөөн л байгаа байх, манайх гэхэд нэгдүгээр сарын төлбөр хуучнаа бодвол хоёр дахин нэмэгдсэн байсан. Эхлээд холбогдох газраас асууна. Тэгээд төлөхөөс өөр аргагүй, конторын хүмүүстэйгээ холбогдохоор учраа хэлэхгүй шүү дээ. Ийм болохоор, ингэж нэмэгдлээ гэдэг ч юм уу хурал уулзалтандаа ер нь иргэдийн байр суурийг сонсохгүй, дураараа л нэмээд байх шиг санагддаг. Энэ нэмэгдэл нь бүх л хүнд ил болон далдаар нөлөөлж байгаа гэдгийг боддоггүй байх. Тооцоо судалгаа хийж, төлөх чадамж байгаа үгүйг тодорхойлж шийдвэр гаргадаг байх хэрэгтэй" гэлээ.

Сонгинохайрхан дүүргийн 25 дугаар хорооны оршин суугч Б.Оюунцэцэг “Гэр хороололд амьдагдаг.Усны төлбөрийг нэмсэн нь хоёр талтай гэж бодож байгаа. Усны үнэ хямдхан байхаар их хэрэглэдэг байх, харин тодорхой хэмжээнд нэмчихвэл ядаж л гамтай хэрэглэх байх. Би өөрөө ажил хийдэг болохоор усны төлбөр нэмэгдсэн нь нэг их мэдэгдэхгүй байна. Гэр хорооллын айлууд, орон сууцны айлтай харьцуулахад хэрэглээ бага гэж боддог. Ер нь бол ундны усаа хайрлаж, гамнаж хэрэглэх нь чухал санагддаг” гэлээ.

Дээрх асуудлын дагуу иргэдтэй ойр ажиллаж, мэдээллээр хангадаг мэргэжилтнүүд болох контороос усны төлбөр нэмэгдсэнээс хойш ямар асуудлууд үүссэн талаар тодруулсан юм.

Сүхбаатар дүүргийн XI хорооны Хангай хотхон контор, Гүйцэтгэх захирал Г.Баярсайхан “Контор гэдэг байгууллага хэрэгжүүлэгч нэгж юм. Усны төлбөр нэмэгдсэн, дулааны төлбөр нэмэгдээгүй. Бид өөрсдийн дураар усны төлбөрийг нэмэх ямар ч боломж байдаггүй. Усны төлбөр нэмэгдсэнээс хойш иргэдийн гомдол, санал гарсаар л байгаа. Цөөн хэдэн айлууд нь асуудлын мөн чанарыг ойлгоод төлбөрөө төлсөн. Харин дийлэнх оршин суугчид төлбөрөө төлөхгүй байх хандлага ажиглагдаж байна. Мөн иргэд нэг зүйлийг ойлгох хэрэгтэй. Контор бол тогтоол, шийдвэрийн дагуу та бүхэнд үйлчилдэг байгууллага, үнийн дүн өсөхөд нөлөөлөх хэмжээний байгууллага биш. Нөгөөтээгүүр конторын үйл ажиллагаанд иргэд хүлээцтэй байж хамтран ажиллах нь чухал байна” гэв.

Усны төлбөр яагаад нэмэгдсэн талаар тодруулж, иргэдийн эргэлзэж буй зангилааг тайлахаар Хот, суурины ус хангамж, Ариутгах татуургын ашиглалт, Үйлчилгээний зөвлөлийн дарга Ж.Батсуурьтай уулзсан юм.

Тэрбээр “2022 оны нэгдүгээр сарын 1-нээс Улаанбаатар хотод гэр хорооллын усны үнийг хоёр төгрөг, орон сууцны усыг нэг төгрөг долоон мөнгө болгосон. Усыг түгээж, олборлоод, айл өрхүүдэд түгээх үйл явцын, мэргэжлийн байгууллагын зардлыг олж авах шаардлага үүсэн. Ус түгээх байгууллагууд, аж ахуйн тооцоон дээр ажилладаг ч гаргаж буй зардлаа нөхөж чаддаггүй. Түгээх байгууллагуудын үйл ажиллагааг зогсоохгүй, айл өрхийн усны хэрэглээг тасалдуулахгүйн төлөө ажилладаг. Гэвч үүссэн нөхцөл байдлыг харвал тоног, төхөөрөмж, эвдрэл гэмтэл, засвар үйлчилгээ зэрэг урсгал зардал гээд огтхон ч ашиг харалгүйгээр ажилласаар ирсэн. Удаан хугацаанд ингэж ажиллах нь тогтвортой байдлаа хангахад нөлөөлөх эрсдэл үүсэж болзошгүй байгаа юм. Бид хүссэнээрээ нэмэх ямар ч боломжгүй.

Энэ шийдвэр бол судалгаа шинжилгээн дээр суурилж гаргасан тооцоолол юм. Манай байгууллага байгуулагдаад арван жил болж байна. Энэ хугацаанд усны үнэ, тариф тогтоох ажлуудыг зохион байгуулахдаа судалгаан дээр үндэслэж хийсээр ирсэн уламжлалтай. Мөн аль нэг талд ажиллах гэж байгуулагдсан байгууллага биш, харин хараат бусаар ажилладаг гэдгийг тодотгож хэлмээр байна” гэв.

ӨДРИЙН СУРВАЛЖИЛГА: Усны төлбөрийн нэмэгдэл иргэдийн амьдралд

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1

Сэтгэгдэл үлдээсэн: 2022-03-09 10:26:13

555: Нэмэх нь зөв ш дээ. Усны хязгааргүй хэрэглээгээ өөрсдөө багасгах хэрэгтэй: Тэгэхгүй бол нэг л өдөр ус алтнаас илүү үнэтэй болчихсон байх вий. 1 төгрөг 7 мөнгө гэдэг бол тийм ч өндөр үнэ биш гэж бодож байна.

Шинэ мэдээ

Нийтлэлчид