Монголын Урчуудын Эвлэлийн 80 жилийн ой, Олон Улсын Эмэгтэйчүүдийн эрхийг хамгаалах өдрийг тохиолдуулж “СААРАЛ ХАЙРЦАГ” эмэгтэй уран бүтээлчдийн үзэсгэлэн гуравдугаар сарын 7-18-ны өдрүүдэд МУЭ-ийн арт галерейд зохион байгуулагдах гэж байна.

  Нийгэм эдийн засгийн өөрчлөлт, хөгжлийн үйл явц, эмэгтэйчүүдийн тэгш оролцоог дэмжих, сургалт, сурталчилгаа бүхий нөлөөллийн ажлууд зохион байгуулах төдийгүй өнөөгийн нийгэмд тулгамдаж буй экологийн тэнцвэргүй байдал, уур амьсгалын өөрчлөлт, байгаль орчны доройтол, агаар орчны бохирдол, төлөвлөлтгүй хот, хүн амын бөөгнөрөл, гэр бүл, хүүхэд хамгаалал, нийгмийн харилцаа хандлага зэрэг олон асуудлуудыг хөндсөн, тулгарч буй саад бэрхшээлийг даван гарах гэсэн эмэгтэйчүүдийн оролцоог нэмэгдүүлэхэд гол анхаарлаа хандуулах нь үзэсгэлэнгийн гол утга санаа юм.

  Мөн уран бүтээлчид бүтээлдээ “Сайн сайхныг магтан дуулсаар, нөгөө талд нийгэм дэх хүчирхийлэл буурахгүй байсаар. Яагаад эмэгтэйчүүдийн бүтээл үргэлж цэцэг навч, гоо үзэмж, гоё ганган, хөөрхөн сайхны тухай дүрслэх ёстой гэж? Яагаад бодит байдлаа илчилдэггүй, илэрхийлдэггүй, тодруулбал хашгирдаггүй юм бэ? Эмэгтэйчүүдийн эрхийн төлөө хэн дуугарч, бидний эсвэл тэдний эрхийг хэн хамгаалах ёстой гэж ? Эмэгтэйчүүдийн эрхийн өдөр, бүхий л үзвэрүүд яагаад наран, саран, хатан, ижий гэсэн нэртэй байдаг юм бол ? Энэ мэт олон, олон ЯАГААД ийм, ТИЙМ юм бэ ?” хэмээх асуудлаар шийдэл олохыг хичээжээ.