Эргэлт.мн мэдээллийн сайт долоо хоног бүр өнгөрөгч долоо хоногт болж өрнөсөн онцлох үйл явдлыг тоймлон хүргэдэг уламжлалтай билээ. Өнгөрч буй долоо хоногт Нийслэлийн засаг дарга автомашины түгжрэлийг хэрхэн бууруулах тухай шинэ санаачилга, байр сууриа илэрхийлж, "Алтан тариа” компанийн удирдлагууд барилга дээрээ Украины туг байршуулсан бол өрнөж буй үйл явдлуудаас өмгөөлөгч Н.Батбаярын охин Б.Ариунзаяаг сургуулиас нь хасаж, хилээр гарахыг нь хориглосон үйл явдлыг онцоллоо.

Нийслэлийн Засаг дарга бөгөөд Улаанбаатар хотын захирагч Д.Сумъяабазар нийслэлийн түгжрэлийг хэрхэн шийдэх гарц, төлөвлөгөөнийхөө талаар мэдээлэл өгөв

       Тэрбээр “Машин ачилтын үнийг 100 мянган төгрөг болгох шийдвэр хэн ч гаргаагүй. Нэгдүгээр эгнээнд зогссон машиныг ачихаа больвол түгжрэл улам нэмэгдэнэ. Аргацаасан байдлаар явах юм бол түгжрэл арилахгүй, буурахгүй. Долоон жилээс дээш насжилттай, далайн шуурганд өртсөн ямбий машиныг Монголд оруулж ирээд, засварлаад, талх шиг зараад байгааг болиулах хэрэгтэй.Манай Улаанбаатар хуучин машины оршуулгын хот биш. Түгжрэлийг бууруулахын тулд “Улаанбаатарын ухаалаг удирдлагын систем” гэдгийг нэн тэргүүнд хийхээр зорьж байна.Буруу хүрдтэй жолооны машиныг хязгаарлах эсэх асуудлаар УИХ шийдвэр гаргана. Нийслэлээс саналаа оруулна. Энэ бол цогц шийдэл, төлөвлөгөөтэй ажил юм.  Би бүрэн эрхийнхээ хугацаанд түгжрэлийг 50 хүртэлх хувь бууруулна гэж зорьж байна. Хүн амын төвлөрлийг зөв зохицуулбал эдийн засаг өөрөө босоод ирнэ. Ийм тогтолцоог бүрдүүлье" гэсэн байр суурь илэрхийлсэн юм. 

"Алтан тариа” компани Украин болон ОХУ-ын хооронд үүсээд буй мөргөлдөөнийг эсэргүүцэн, компанийн барилга дээрээ Украины тугийг байршууллаа

            Энэ талаар тус компанийн захирал П.Цэнгүүн “Путин түрэмгий  дайнаа зогсоо! Украины олон зуун гэмгүй иргэд  амь үрэгдэж, Орос Улсын олон сая иргэд  хохирох ёсгүй. Монгол Улс эрх чөлөөт тусгаар тогтносон улс мөн” гэж өөрийн твиттер хуудастаа жиргэсэн аж. Тэгвэл Сонгинохайрхан дүүргийн цагдаагийн албан хаагчид тус барилгад очиж “Украины  тугаа буулга” гэсэн шаардлага тавьсан.

 Бусдын толгой дээр халуун кофе асгасан Б.Ариунзаяаг МУИС-ийн, Хууль зүйн сургуулиас нь хөөхөөр оюутнууд гарын үсэг цуглуулж, хасах талаар хүсэлт хүргүүлсэн. Мөн шүүхээс түүнийг хилээр гарахыг хориглолоо

Бусдын толгой дээр халуун кофе асгасан Б.Ариунзаяаг МУИС-ийн, Хууль зүйн сургуулиас нь хөөхөөр оюутнууд гарын үсэг цуглуулсан. Үүнтэй холбогдолтой тус сургуулийн удирдлагууд түүнийг ёс зүйн доголдол гаргасан гэж үзэж сургуулиас хасах хүсэлтэй байгааг илэрхийлсэн.

           Энэ үйл явдал болсны дараа түүний өмгөөлөгч Л.Баттогтох сэтгүүлчдэд мэдээлэл өгөхдөө “Би өчигдрөөс Б.Ариунзаяагийн  өмгөөлөгчөөр ажиллаж байна. Түүнтэй холбогдож чадахгүй удсан. Өнөөдөр аавтай нь холбогдож түүнийг олж уулзсан.  Б.Ариунзаяа сэтгэл санаагаар унаж, цочирдсон  байна. Б.Ариунзаяа хохирогч болсон. Учир нь тухайн үед хамт байсан дөрвөн хүүхэд эхлээд Б.Ариунзаяаг доромжилсон учраас ууж байсан хүйтэн кофегоо толгой дээр нь дусаасан юм билээ. Ойролцоогоор 20-30 грамм дуссан. Түүнээс биш тагыг нь авч асгаагүй.  Б.Ариунзаяа ихэвчлэн хүйтэн зүйл уудаг. Тэр  одоо нэлээд цочирдсон байна” гэв.

           Мөн гуравдугаар сарын 4-ны өдөр иргэн Б.Ариунзаяаг хилээр гаргахыг хориглох саналыг прокуророос шүүхэд хүргүүлжээ. Тодруулбал, Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны шүүхэд түүнийг хилээр гаргах эсэхийг шийдэх шүүх хурал өчигдөр буюу гуравдугаар сарын 4-ны өдөр болсон. Тэгвэл нийслэлийн Сүхбаатар дүүргийн Прокурорын газраас Б.Ариунзаяад Эрүүгийн хэрэг хянан шийдвэрлэх тухай хуулийн 14.5 дугаар зүйлийн 1  дэх хэсэгт заасан “...Монгол Улсын хилээр гарахыг хязгаарлах хязгаарлалт тогтоох, мөн тодорхой хүнтэй уулзахыг хориглох буюу хохирогч М болон түүний ар гэрийхэнтэй уулзахыг хориглох...” хязгаарлалт тогтоох таслан сэргийлэх арга хэмжээ авах тухай саналыг хянан хэлэлцжээ.

            Шүүхээс хавтаст хэрэгт авагдсан бичгийн нотлох баримтууд болоод шүүхийн хэлэлцүүлэгт гаргасан прокурорын дүгнэлт, өмгөөлөгчийн санал зэргийг судалж үзээд прокуророос гаргасан “...Тодорхой хүнтэй уулзахыг хориглох буюу хохирогч М болон түүний ар гэрийхэнтэй уулзахыг хориглох...” хязгаарлалт тогтоох санал нь үндэслэлгүй байх тул хүлээн авахаас татгалзаж, харин Эрүүгийн хэрэг хянан шийдвэрлэх тухай хуулийн зорилтод нийцүүлэн 2022 оны гуравдугаар сарын 4-ний өдрөөс эхлэн Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авч, шүүгчийн захирамжийн хувийг Хил хамгаалах ерөнхий газарт даруй хүргүүлэхийг шүүгчийн туслахад, захирамжийн хэрэгжилтэд хяналт тавьж ажиллахыг Хил хамгаалах ерөнхий газарт тус тус даалгаж шийдвэрлэлээ.