"Алтан тариа” компани  дайныг эсэргүүцэж, өөрийн компанийн байшин дээрэ Украины тугийг байршуулжээ. Энэ талаар тус компанийн захирал П.Цэнгүүн “Путин түрэмгий  дайнаа зогсоо! Украины олон зуун гэмгүй иргэд  амь үрэгдэж, Орос Улсын олон сая иргэд  хохирох ёсгүй. Монгол Улс эрх чөлөөт тусгаар тогтносон улс мөн “ гэж өөрийн твиттер хуудастаа жиргэжээ. Тэгвэл Сонгинохайрхан дүүргийн  цагдаагийн албан хаагчид тус байранд ирж, “Украины  тугаа буулга” гэсэн шаардлага тавьсан байна.

   Бид тус шаардлагын талаар “Алтан тариа” компанийн бизнес хөгжлийн захирал Ө.Саруул-Эрдэмээс тодруулахад “Бид эрх чөлөөт Монгол Улсынхаа хуулийн хүрээнд дайныг эсэргүүцэн үзэл бодлоо илэрхийлэн компанийнхаа дээр туг байршуулсан. Гэтэл цагдаагийн газраас “Хуулиндаа туг байршуулж, үзэл бодлоо илэрхийлэх зүйл байхгүй, тугаа буулга” гэсэн шаардлагыг хэлж байна. Тусгаар тоготносон улсдаа бид үзэл бодлоо чөлөөтэй илэрхийлэх эрхтэй болохоос дуугүй байх хууль ч байхгүй. Энэ ч утгаар бид шаардлага тавьсан цагдаа нарт туг байршуулан үзэл бодлоо илэрхийлж болохгүй гэсэн бичиг болон хуулийн заалтаа аваад ир гэдэг хариуг өгөөд явууллаа. Бид тугаа буулгахгүй, буулгах ч ёсгүй.  Украины олон мянгн иргэд амиа алдаж байна. Ийм байхад амиа бодоод, дуугүй сууж чадахгүй” гэв.