“Хөх сувд” мөсний баяр гуравдугаар сарын 3-4-ний  өдрүүдэд болох гэж байгаа билээ. Энэ талаар Хөвсгөлийн Засаг даргын Тамгын газрын Хэвлэлийн төлөөлөгч Б.Сарантуяагаас тодрууллаа. 

-Энэ жил ямар онцлогтойгоор зохион байгуулж байна вэ?

    -Энэ жилийн хувьд мөсөн дээр автомашин гаргахгүй байгаа. Автомашиныг зогсоол дээр байрлуулна. Өмнө нь зөвшөөрөлгүй машин их гардаг байсан. Харин энэ жил тийм үйл явдал болохгүй. Зааврын дагуу өгөгдсөн маршрутаар явна.

-Иргэдийн аюулгүй байдал дээр хэрхэн анхаарсан бэ?

     -Хөвсгөл аймагт цар тахлын дэгдэлт бага байгаа учраас хоёр жил өнөжсөн мөсний баяр зохион байгуулагдах гэж байна. Иргэдийн аюулгүй байдлыг хангаж ажиллахаар цагдаа болон онцгой байдлын 200 гаруй албан хаагч ажиллаж байгаа.

-Хэдэн хүн хүлээн авна гэж төлөвлөсөн бэ. Зохион байгуулагдах үйл ажиллагааны талаар?

    -Бид 3000-4000 автомашин, 6000-7000 хүн хүлээн авна гэж урьдчилан тооцоолсон. Үйл ажиллагааны хувьд уламжлал болон зохион байгуулагддаг тэмцээн уралдаанаа хийнэ. Мөсний баярын нээлтийн үйл ажиллагаа дөнгөж сая эхэллээ. 

  Мөсний баярын үеэр мөсөн шагай, унадаг дугуй, тэшүүр, мото спортын үзүүлэх тоглолт, нохой чарганы уралдаан, мөсөн дээрх олс таталт, буухиа, “Аав, ээж би” тэмцээн, тахтай хатирч морьдын уралдаан, аймгийн Хөгжимт драмын театрын уран бүтээлчдийн урлагийн тоглолт, бөөгийн тахилга, зан үйл зэрэг үйл ажиллагаа зохион байгуулна.

О.Эрдэнэтунгалаг