Толгой дээрээ халуун кофе асгуулсан гэх хохирогч охины аав Э дараах мэдээллийг өглөө. 

     Тэрбээр "Охины минь бие зовиуртай, толгой болон нүүр нь цэврүүтсэн байдалтай байна. Өчигдөр 15:00 цагийн үед охин минь хоёр найзтайгаа кофе шопод сууж байсан юм билээ. Гэтэл танихгүй хүн хүрч ирээд өшиглөсөн гэсэн.Тэгэхээр нь манай охин "Би чамайг танихгүй. Чи яагаад намайг өшиглөж байгаа юм бэ, миний өмд муухай болчихлоо, гөвж өг" гэсэн чинь толгой дээр нь аваад удаагүй байсан халуун кофегоо асгасан гэсэн. Эрүүл хүнээс ийм үйлдэл гарах ёсгүй. Тэр эмэгтэйн бичлэгийг харахаар охины минь толгой дээр халуун кофе асгасандаа гэмшиж, санаа зовж байгаа зүйл харагдахгүй байгаа юм.

   Тэгээд манай охинд "Аав минь том прокурор хүн. Би баян айлын хүүхэд, та нар намайг яаж ч чадахгүй, цагдаа ирээд л 100 мянган төгрөгөөр торгоно биз, би мөнгийг нь шидчихээд л явна" гэж хэлсэн байгаа юм. Огт танихгүй,  эрүүл, галзуу нь мэдэгдэхгүй хүн зүгээр сууж байсан охины минь толгой дээр халуун кофе асгана гэдэг байж боломгүй зүйл, би их гомдолтой байна. Тухайн үед  ямар азаар охины минь найз бичлэг хийсэн юм, хэрэв бичлэг хийгээгүй бол манай охин тэр эмэгтэйн толгой дээр кофе асгасан болж мэдэхээр байгаа юм. Охиныг цагдаа дуудахад, толгой дээр нь кофе асгасан эмэгтэй найзтайгаа гараад явсан гэсэн. Тэгээд охин минь цагдаад хандаж "Миний толгой өвдөөд байна, эмнэлэг явж үзүүлье гэсэн чинь цагдаагийн зүгээс шүүх эмнэлэгт үзүүлчихээд ир, би толгой дээр чинь кофе асгасан эмэгтэйг бариад байж байя" гэсэн. Тэгээд охиныг минь эмнэлэг явж байх замд цагдаа залгаад "Сүхбаатар дүүргийн нэгдүгээр хэлтэст хүрээд ир, байцаагчаас дугаар авч байж шүүх эмнэлэгт үзүүлдэг" гэж хэлэхэд нь охин маань буцаад очсон байгаа юм. Тэгээд цагдаагийн газар очиход нь нөгөө эмэгтэй зөрөөд гарч явсан гэсэн. Тэгэхдээ "Чи утасны дугаараа өгчих, би жаахан уур бухимдалтай хүн байгаа юм. Эмчилгээ хийлгэнэ гэвэл би мөнгийг нь өгье, та нар намайг ер нь яаж ч чадахгүй" гэж хэлээд явсан гэсэн. Тэгээд охин руу маань өчигдрөөс хойш утасдаж "Гомдлоо буцаачих, би цагдаад асуудалтай болчихлоо, цагдаагийн хэрэгт чи бид хоёрын асуудал хамаагүй шүү" гээд байгаа юм” гэв.