Хан-Уул дүүргийн иргэдийн төлөөлөгчдийн хурал болон Хан-Уул дүүргийн цагдаагийн байгуулага хамтран гэмт хэрэг зөрчлийг бууруулах зорилгоор "Оюутан эргүүл" хөтөлбөрийг зохион байгуулахаар болжээ. Тус хөтөлбөр өнөөдөр буюу гуравдугаар сарын 1-нээс хэрэгжиж эхлэх бөгөөд эхний ээлжийн сургалт, нээлтийн үйл ажиллагаа ХААИС дээр боллоо. Сургалтаар оюутан залуус тус хөтөлбөрт хамрагдсанаар хэрхэн ажиллах, ажиллах явцад олгох шагнал урамшуулал болон үйл ажиллагааны төлөвлөгөөг танилцуулсан юм.

    Энэ үеэр  Хан-Уул дүүргийн гэмт хэргээс урьдчилан сэргийлэх ажлын зохицуулах салбар зөвлөлийн ажлын албаны дарга Батмөнх “Хан-Уул дүүргийн гэмт хэргээс урьдчилан сэргийлэх ажлын зохицуулах салбар, Хан-Уул дүүргийн иргэдийн төлөөлөгчдийн хурлаас “Оюутан эргүүл” ажиллуулах шийдвэр өнгөрсөн оны арван сард  батлагдсан. Ингэхдээ  тухайн үед цар тахалтай байсан учраас хойшлогдоод, одоо цаг үеийн нөхцөл байдал харьцангуй сайн байгаа энэ үед оюутнуудтайгаа хамтарч энэхүү эргүүлийг ажиллуулах журмыг танилцуулах, мөн Хан-уул дүүргийн гэмт хэргийн нөхцөл байдал, үүнээс сэргийлэхэд иргэд хэрхэн оролцох талаар тайлбарлаж байна. Мөн энэ сайн дурын үйл ажиллагаанд оролцсоноор хөтөлбөрт хамрагдах оюутнуудад ямар хэрэгтэй байх талаар анхан шатны сургалт орж байна. Цаашид тус дүүрэгт үйл ажиллагаа явуулдаг бүх их дээд сургуулиудад энэхүү хөтөлбөрөө хэрэгжүүлээд байнгын тогтмол үйл ажиллаагаа явуулснаар гудамж талбайд үйлдэгдэж байгаа гэмт хэргийн тоо буурах, оюутан залуус хуулийн мэдлэгтэй болох үр дүнтэй ажил гэж харж байгаа”гэв.

    “Оюутан эргүүл” хөтөлбөрт хамрагдах оюутан, залуус нь  дүүрэг, хороодод эргүүл  болон замын цагдаа гэсэн хоёр  чиглэлээр ажиллана.  Хөтөлбөрийн хүрээнд эхний ээлжид замын цагдаагийн чиглэлийн үйл ажиллагаа эхлэх бол эргүүл хийх оюутан, залуус  автобусны зогсоолд зогсож байгаа хувийн унаа, автобусны буудал руу шахаж зогссон иргэдэд шаардлага тавьж, зам гарч байгаа хүүхэд багачуудад туслан ажиллах юм. Тус хөтөлбөрт хамрагдаж байгаа оюутан залуус цаашид цагдаагийн байгуулагад ажиллах, гадаадын их дээд сургуульд хамрагдахад дэмжлэг болох тодорхойлолт гаргаж өгөх,  идэвх санаачилгатай ажилласан хүүхдүүдийг сургууль болон цагдаагийн байгуулага хамтран шагнаж урамшуулна гэдгийг хөтөлбөрийн зохион байгуулагчид онцлон хэллээ.

  Хөтөлбөрт хамрагдсан оюутнууд цагдаагийн “E-Police” апликэйшн болон хариуцсан цагдаагийн албан хаагчтай хамтран заавар зөвлөгөө авч үйл ажиллагаа явуулна. Харин эргүүлд гарч байгаа оюутны аюулгүй байдлыг хангах үүднээс баг бүрдүүлэн ажиллана гэв.

                                   О.Эрдэнэтунгалаг