Монголын гүйлтийн тэшүүрийн насанд хүрэгчид, мастеруудын улсын аварга шалгаруулах тэмцээнд Баян-Өлгий аймгийг төлөөлөн оролцсон Улаанхус сумын нэгдүгээр сургуулийн бага ангийн багш Т.Ташкен хүрэл медаль хүртлээ. Тэрбээр 50-60 насны ангилалд 500, 1000 метрийн зайд хурд хүч, авхаалж самбаагаа сорин өрсөлдөж, 500 метрийн төрөлд ийнхүү медальт байранд шалгарчээ. Монголын Тэшүүрийн мастеруудын холбоо, Монголын тэшүүрийн холбоо хамтран зохион байгуулсан уг тэмцээнд манай улсын өнцөг бүрээс 100 орчим тамирчин оролцсон ажээ.