“Алтай констракшн” ХХК-ийн захирал Х.Бат-Эрдэнийг эрх мэдэл, албан тушаалаа урвуулан ашиглаж, хууль зөрчиж зээл олгосон, авсан зээлээ зориулалт бусаар ашигласан  гэх үндэслэлээр цагдан хорих саналыг Нийслэлийн прокурорын газар болон шүүхэд гаргасан талаар бид өмнө нь мэдээлсэн. Тэгвэл Сүхбаатар дүүргийн Эрүүгийн хэргийн анхан шатны шүүхээс тус саналыг хүлээн авч, Х.Бат-Эрдэнийг нэг сарын хугацаатай цагдан хорих шийдвэр гаргажээ.

Тодруулбал, Нийслэлийн прокурорын газраас яллагдагч Х.Бат-Эрдэнэд Эрүүгийн хуулийн тусгай ангийн 22.1 дүгээр зүйлийн 2 дахь хэсэг /албан тушаалын байдлаа урвуулан ашигласан/, 18.6 дугаар зүйлийн /мөнгө угаах/ 2.2 дахь хэсэгт /байнга, тогтвортой үйлдэж/ заасан гэмт хэрэгт яллагдагчаар татаж, Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.3 дахь хэсэгт заасан “Гэмт хэрэг үйлдэж болзошгүй талаар үндэслэл бүхий баримт, мэдээлэл байгаа” гэх үндэслэлээр цагдан хорих таслан сэргийлэх арга хэмжээ авах санал ирүүлснийг Сүхбаатар дүүргийн Эрүүгийн хэргийн анхан шатны шүүх хүлээн авч, яллагдагч Х.Бат-Эрдэнийг өчигдөр буюу хоёрдугаар сарын 23-ны өдрөөс эхлэн нэг сарын хугацаатай цагдан хорих шийдвэр гаргасан байна.