Хөгжлийн банкнаас санхүүжүүлсэн төсөл, хөтөлбөрийн хэрэгжилтэд хяналт тавьж, шалгалт хийсэн талаарх Засгийн газар, Монголбанк болон аудитын тайлан, дүгнэлт, зөвлөмжтэй танилцах үүрэг бүхий ажлын баг хэвлэлийн хурал хийж мэдээлэл өгсөн юм.

   УИХ-ын гишүүн Б.Баттөмөр “Тус банктай холбоотой 800 хуудас материалтай уншиж танилцлаа. Хөгжлийн банкнаас олгосон нийт зээлийн эх үүсвэрийн 68.9 хувь нь Засгийн газрын баталгаагүй олгосон байна. Олгосон зээлийн 31.8 хувь нь Засгийн газрын баталгаагаар олгожээ. Монгол Улс 2023 оны дөрөвдүгээр сард БНХАУ-ын Хөгжлийн банкны 63 тэрбум, 2023 оны аравдугаар сард 500 сая долларын бонд төлнө. Мөн 2023 оны арванхоёрдугаар сард Япон Улсын Хөгжлийн банкны эргэн төлөлтийг хийнэ. Эргэн төлөлтийг хийхэд олгосон зээл хүрэлцэхгүй. Иймд Засгийн газар, Монголын төрийн нуруун дээр ачаалал ирэх төлөвтэй байна. Хөгжлийн банкны Эрсдэлийн санд 700 орчим тэрбум төгрөг байсныг Монгол банк 1.3 их наяд төгрөг болгох зөвлөмж өгсөн. Тус банк нийт 74 төсөлд зээл олгосноос 21 нь зориулалтын бусаар зээлийн хөрөнгөө зарцуулжээ. Нийт зээлийн багцын 687 тэрбум чанаргүй, 500 орчим тэрбум төгрөг анхаарал хандуулах. Үүнд таван зээл бий. "Эрдэнэс Монгол", Эрчим хүчний яамны зээлүүд багтана. 131 тэрбум төгрөгийн зээл хэвийн байна” гэв.