Монгол Улсын Шүүхийн ерөнхий зөвлөлөөс өнгөрсөн оны тайлан мэдээг танилцууллаа. Энэ үеэр Эрүү болон зөрчлийн хэрэг эвлэрүүлэн зуучлалын дүн мэдээг Шүүхийн статистик хариуцсан мэргэжилтэн Э.Ганцэцэг өглөө.

   Тэрбээр “Эрүүгийн анхан шатны шүүхүүдийн тайлан тооцоонд 12060 хэрэг хянан шийдвэрлэсэн нь өмнөх оны мөн үеэс 1402 хэргээр буюу 10.4 хувиар буурсан дүнтэй гарсан бол давж заалдах шатны хэргийн шүүхүүд 2105 хэргээр хянаж шийдвэрлэсэн байна. Ингэснээр 597 хэргээр буюу 22.1 хувиар буурсан дүнтэй гарчээ. Харин  хяналтын шатны шүүхийн Эрүүгийн хэргийн танхимын тайлан тооцоонд 322 хэрэг хянан шийдвэрлэсэн нь өмнөх оны мөн үетэй харьцуулбал, 363 хэргээр буюу  53 хувиар буурчээ. Түүнчлэн анхан шатны шүүхүүдийн хянан шийдвэрлэсэн хэргийн 17.4 хувь давж заалдах шатны шүүхээр, давж заалдах шатны хянан шийдвэрлэсэн хэргийн 15.3 хувь нь хяналтын шатны шүүхээр тус тус хянан шийдвэрлэсэн байна. 

  Анхан шатны шүүхээр хянан шийдвэрлэсэн ихэнх төрлийн гэмт хэрэг буурсан үзүүлэлттэй гарсан бол хүчин болон авлигын гэмт хэрэг өссөн дүнтэй гарсан байна. Тодруулбал,  хүчиндэх гэмт хэрэг нь өнгөрсөн оны мөн үед 307 хэргийг хянан шийдвэрлэж байсан бол өнгөрсөн онд 346 хэргийг хянан шийдвэрлэсэн байна. Харин залилах гэмт хэрэг 337 хэргээр хянан шийдвэрлэж байсан бол 22 хэргээр буюу 3.1 хувиар өсжээ. Мөн мансууруулах, сэтгэцэд нөлөөлөх бодисыг ашиглах гэмт хэрэг 147 хэрэг хянан шийдвэрлэсэн нь өнгөрсөн оны мөн үетэй харьцуулахад 44 хэргээр буюу 18.8 хувиар буурсан дүнтэй гарсан байна” гэв.

Авлигын гэмт хэрэг өнгөрсөн оны мөн үетэй харьцуулахад өссөн

   Мөн үргэлжлүүлэн тэрбээр “Нийт 235 авлигын хэргийг тухайн тайланд хугацаанд хүлээн авснаас 33 хэргийг прокурорт буцааж, дөрвөн хэргийг түдгэлзүүлж, нэг хэргийг харьяаллын дагуу шилжүүлж, 155 хэргийг хянан шийдвэрлэж, 42 хэргийн үлдэгдэлтэй гарсан байна. Хянан шийдвэрлэсэн авлигын гэмт хэргийн 49 хувийг эрх мэдэл, албан тушаалын байдлаа урвуулан ашиглах гэмт хэрэг эзэлж байна” гэж мэдээлэв.