МҮОНРТ-ийн суурь хураамж 1100-9000 төгрөг болж нэмэгдсэн тухай олон нийтийн сүлжээнд цацагдсан. Энэ талаар МҮОНРТ-ийн ахлах менежер Б.Ариунболдоос тодрууллаа. Тэрбээр “МҮОНРТ-ийн суурь хураамж 9000 төгрөг болж нэмэгдсэн гэдэг нь худлаа. Бид суурь хураамжийг нэмэх боломжгүй. Хуулийнхаа дагуу заавал Засгийн газрын хуралдаанаар хэлэлцэж суурь хураамж нэмэх эсэх талаар шийднэ. Долларын үнэ нэмэгдсэнтэй холбоотойгоор бид суурь хураамж нэмэх санал гаргасан. Гэвч хэлэлцэж шийдэгдээгүй. МҮОНРТ-ийн суурь хураамжийг нэг ам.долларын ханштай харьцуулж нэмдэг. Тэгэхээр одоогийн ам.доллартой харьцуулахад суурь хураамжийн төлбөрөө 3000 төгрөг болгохоор байгаа. Одоогоор Улаанбаатар хотод оршин суугаа айл өрхөөс 1100 төгрөг, албан байгууллагаас 1650 төгрөгийн хураамж авдаг. Харин аймгийн төвийн айлаас 850, албан байгууллага, аж ахуйн нэгжээс 1200 төгрөг, сум, багийн иргэдээс 600 төгрөгийн хураамж авдаг хэвээрээ байгаа” гэв.