ТЕг-аас иргэн Ч.Мөнхбаярыг баривчилсантай холбоотойгоор албан ёсны мэдэгдэл хийлээ. Хэвлэлийн хурлын үеэр ТЕГ-ын хэвлэлийн төлөөлөгч П.Өгөөмөр иргэн Ч.Мөнхбаярын баривчилгаанаас өмнө Монгол Улсын иргэн гадаадын тагнуулын байгууллагатай хамтарч ажилласантай холбоотой хэргийг илрүүлж, шалган шийдвэрлэсэн тухай мэдээлэл өгөв.

          Тэрбээр “Монгол Улсын иргэн Л нь гадаадын тагнуулын байгууллагатай хууль бусаар хамтран ажиллаж, тэдний өгсөн үүрэг даалгаврыг биелүүлж, түүнийхээ хариуд мөнгөн урамшуулал авсан удаа дараагийн үйлдлийг илрүүлж, мөрдөн шалгах ажиллагаа явуулсан. Уг хэрэгт прокурорын байгууллагаас яллах дүгнэлт үйлдэн шүүхэд шилжүүлсэн. 2022 оны хоёрдугаар сарын 8-ны өдрийн Чингэлтэй дүүргийн Эрүүгийн хэргийн анхан шатны шүүхээс тус хэргийг хянан хэлэлцэж, гэм буруутайд тооцон найман жилийн хорих ял оноогоод байна.

          Мөн Монгол Улсын иргэн А, Э нар нь гадаадын тагнуулын байгууллагатай хууль бусаар хамтран ажиллаж, гадаадын тагнуулын байгууллагын нэр бүхий ажилтан Монгол Улсын нутаг дэвсгэрт тагнуулын үйл ажиллагаа явуулсан үйлдэл Эрүүгийн хуулийн 19.4, 19.10 дугаар зүйлд зааснаар 2021 оны наймдугаар сард эрүүгийн хэрэг үүсгэж, яллагдагчаар татаж, мөрдөн шалгах ажиллагаа явуулсан. Тус хэрэгт прокурорын байгууллагаас яллах дүгнэлт үйлдэн шүүхэд шилжүүлсэн. Одоогоор уг хэрэг Хан-Уул дүүргийн Эрүүгийн хэргийн анхан шатны шүүхэд хянан хэлэлцэж байгаа” гэлээ.