Хөгжлийн банктай холбоотой асуудлаар Д.Дэлгэрсайхан, Ч.Мөнхбаяр, Б.Батбаяр нарыг цагдан хорих эсэхийн шүүх хурал эхэллээ. Энэ үеэр Б.Батбаярын өмгөөлөгч П.Одонтунгалаг сэтгүүлчдэд өгсөн мэдээлэлдээ “Эрүүгийн хэрэг үүсгэж, яллагдагчаар татсан гэхээс өөр мэдээлэлгүй байна. Бид өчигдөр 22:00 цагт түүнийг цагдан хорих болсныг нь мэдсэн. Миний үйлчлүүлэгч Б.Батбаярыг Хөгжлийн банкны асуудлаар сүүлийн 2-3 жил шалгаж байгаа. Бид шүүхээс дуудсан үед нь очиж, байцаалт өгч, шалгах ажиллагаанд саад учруулж байгаагүй. 2018 онд өгч байсан гэрчүүдийн мэдүүлгээр 2019 оны тавдугаар сард Эрүүгийн хэрэг үүсгэж, яллагдагчаар татсан. Үүнээс хойш гэрчүүдэд ямар нэг байдлаар нөлөөлсөн байж болзошгүй гээд шүүхэд гомдол гаргасан байгаа. Шүүхийн байгууллага цагдан хорих асуудлыг шийдэж чадаж байна уу гэдэгт дүгнэлт өгөх ёстой. Үндэслэл ч үгүй, баримт ч үгүйгээр хүнийг цагдан хорьж болохгүй” гэлээ.