Зорчигч тээврийн нэгтгэлийн жолооч нарт гялгар ууттай хоол тараасан бичлэг олон нийтийн сүлжээгээр цацагдсан. Энэ тухай тус байгууллагын аж ахуйн менежер Ч.Цацралт-Одоос тодрууллаа. Тэрбээр “Зорчигч тээврийн нэгтгэл хоёр баазтай. Хан-Уул дүүргийн III хорооны нутаг дэвсгэрт байрлах I баазын ажилчдын дундаас стандартын шаардлага хангаагүй буюу гялгар ууттай хоол тараасан тухай  бичлэг олон нийтэд ил болсон. Энэ нь хамтрагч талын буруутай үйлдэл юм. Хамтрагч талынхан бидэнд “Хоолны савны хомсдол үүссэн учир гялгар ууттай хоол өгсөн” гэж тайлбарласан. Тэдний гаргасан хариуцлагагүй үйлдэлд ХАБ-ын мэргэжилтнүүд  хяналт, шалгалт хийж, гэрээг цуцлах хүртэл арга хэмжээ авахаар ажиллаж байна. Өмнө нь энэ төрлийн алдаа, дутагдал манайд гарч байгаагүй. Манай байгууллага дараагийн хоол үйлчилгээ эрхлэх компаниа сонгон шалгаруулахаар ажиллаж байна. Манайхтай хамтран ажиллаж буй компани дараагийн сонгон шалгаруулалтад оролцох боломжтой. Гэхдээ хариуцлага алдсан болохоор сонгогдохгүй байх. Эцсийн шийдвэрийг сонгон шалгаруулалтын комисс гаргана” гэлээ.