Ерөнхий сайд Л.Оюун-Эрдэнэ цаг үеийн асуудлаар мэдээлэл өглөө.

    Тэрбээр “Засгийн газар тэтгэвэр тэтгэмж, хөдөлмөрийн хөлсний доод хэмжээг хөдөлгөж чадахгүй тодорхой хэмжээний хязгаарлалтад байгаа. 40 литрийн багтаамжтай эдийн засгийн савыг 100 литр болгох нь бидний гол асуудал. Бид олон хууль, хуулийн төсөл ярьдаг. Харин үүнийг санхүүжүүлэх боломжгүй.  Яагаад гэвэл нэг хүнд ногдох дотоодын нийт бүтээгдэхүүн бага байдаг. Тийм учир экспортоо нэмж, импортоо орлуулж Хөгжлийн банкыг цэвэрлэх хэрэгтэй. Тэгж байж илүү том төсөл хөдөлгөж чадна. Улсын төсөвт жилд 10-15 их наяд төгрөг төвлөрдөг. Улсын төсөв бол Монгол Улсын аюулгүй байдлыг хангадаг, төрийн албан хаагчдын цалинг олгодог, урсгал зардлаа тооцож зарцуулдаг мөнгө. Тиймээс үүнд ямар нэгэн улс төрийн шалтгаан байгаа гэж хардахаас илүүтэй Хөгжлийн банкыг бусад орны Хөгжлийн банк шиг болгох нь Засгийн газрын гол бодлого, зорилго. Ингэж л Шинэ сэргэлтийн бодлого хэрэгжиж, хувийн хэвшлийнхэн хөгжих боломж бүрдэнэ” гэлээ.