Барилга, хот байгуулалтын сайдын ээлжит шуурхай хуралдаан өнөөдөр буюу хоёрдугаар сарын 14-нд болжээ. Шуурхай хуралдааны эхэнд яам, харьяа байгууллагууд өнгөрсөн 14 хоногийн хугацаанд хийж хэрэгжүүлсэн ажил болон ирэх өдрүүдэд хэрэгжүүлэх ажлын талаарх мэдээллээ танилцуулсан байна. Барилга, хот байгуулалтын сайд Б.Мөнхбаатар танилцуулга мэдээллийн хүрээнд газруудаас нэмэлт мэдээлэл болон санал хүсэлт сонсож, холбогдох үүрэг даалгаваруудыг өгчээ..

            Үүнд Аймаг, Нийслэлийн Засаг дарга нартай уулзаж, гэрээ байгуулах ажлыг энэ долоо хоногт зохион байгуулж, багц тендерийн талаарх нэгдсэн ойлголтыг орон нутгийн удирдлагуудад өгөх,  2022 оны худалдан авах ажлыг түргэтгэж, эрх шилжсэн ажлуудын даалгаврыг батлуулж, үнэлгээний хороодыг яаралтай байгуулах, Цемент үйлдвэрлэгч нарын үйл ажиллагааг хааж байгаа асуудлуудад анхаарч бодлогын дэмжлэг үзүүлэх, Хөшигийн хөндийн төлөвлөлтийн зургийг эцэслэх, Газрын багц хуулийн төслийг өргөн барихад бэлдэх чиглэл өгч үүрэгжүүлэв.

Мөн энэ долоо хоногт багтаан Барилга, хот байгуулалтын сайд Б.Мөнхбаатар 1008 айлын орон сууцны төслийн гадны хөрөнгө оруулагч нартай уулзах, салбарын цахимжилт болон Төв цэвэрлэх байгууламжийн шинэчлэлийн ажилтай нарийвчлан танилцаж, Орон сууцны санхүүжилтийн хуулийн төсөл, Өмнөговь аймгийн Ханбогд сумын хөгжлийн ерөнхий төлөвлөгөөний талаар мэдээлэл авахаар болжээ.