Ж.ТӨМӨРСҮХ: Хөвсгөл нуурын хөлдөөгүй хэсгийн тэмдэглэгээг хүмүүс харахгүй, машинтайгаа давхиад орчихдог

2022-02-08, 563

Улаан тайгын улсын хамгаалалтын газрын дарга Ж.Төмөрсүх цахим хаягаараа дамжуулан “Хөвсгөл нуурт жил бүр огт хөлддөггүй хэд хэдэн газар бий. Нутгийнхан үүнийг өрх хэмээн ярьдаг. Газар мэдэхгүй хүмүүс тэдгээр өрхнүүдийг огт мэдэхгүй давхиад орчихно” хэмээн бичжээ. Би тус газруудад хаалт, тэмдэглэгээ байдаг эсэх, хэчнээн хүн осолдсон талаар тодрууллаа.

-Та өөрийн цахим хуудастаа Хөвсгөл нуурт хөлдөггүй хэд хэдэн газар байдаг тухай бичжээ. Тус нуурын яг аль хэсэгт, хэчнээн газар байдаг вэ?

-Хөвсгөлийн Хатгалын ойролцоох хэсэг тэр чигээрээ хөлддөггүй. Түүнээс хойшоогоо Эгийн гол, Модот булангийн үзүүр гэх газрууд өнгөц харахад зайрмагтчихсан мэт боловч гүндээ хөлдөөгүй байж байдаг. Ийм газруудыг хүмүүс мэдэхгүй машинтайгаа давхиад орчихдог. Тэгээд далай даахгүй байна гэдэг. Угаас далайд хөлдөггүй хэсэг гэж бий. Далайн доод талд намаг, булан, эрэг гээд зөндөө зүйл бий. Тэдгээр хөлддөггүй хэсгүүд нь дороо халуунаараа хөдөлгөөнтэй байж байдаг. Хүмүүс ийм нарийн учрыг мэддэггүй.

-Хүмүүсийг орохыг хориглосон тэмдэг, тэмдэглэгээ байдаг уу?

-Мэдээж, “Орохыг хориглоно” гэсэн тэмдэглэгээ, хаалт бий. Зарим газар нь хар туг байдаг. Далайн ойролцоо явахад хар туг зоосон газар руу угаас ордоггүй. Гэвч хүмүүс тэмдэглэгээ байсаар байтал яваад орчихно. Зарим нь шөнөөр тэмдэглэгээгээ харахгүй машинтайгаа орох нь бий. Хөвсгөл далайн хамгийн эгзэгтэй хэсэг бол Мэргэний үзүүр. Машин замтай ойр болохоор тэр хэсэг рүү хүмүүс их орчих гээд байдаг. Хамгийн сүүлд гэхэд өнгөрсөн жил нэг жиб машинтай хүмүүс ороод, Онцгой байдлынхан татаж гаргасан.

-Ер сүүлийн жилд мөс цөмөрч, далайд осолдсон хэчнээн тохиолдол бүртгэгдсэн бол?

-Сүүлийн дөрөв, таван жилийн хугацаанд хүмүүс мэддэг болж, сэрэмжилсээр осол харьцангуй багассан. Осолдож эндсэн хүн байхгүй. Харин санамсаргүйгээр машин ороод, татаж гаргасан тохиолдол бий. 1950 оноос хойш Хөвсгөл далайд 20 машин лав орсон гэдэг тоо бий. Дээр үеийг бодоход одоо харин ч аргатай болсон.

Ж.ТӨМӨРСҮХ: Хөвсгөл нуурын хөлдөөгүй хэсгийн тэмдэглэгээг хүмүүс харахгүй, машинтайгаа давхиад орчихдог

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.