“Нэткапитал” ББСБ-ыг үүсгэн байгуулагч Д.Сүндий нарт холбогдох хэргийг өнгөрсөн арванхоёрдугаар сарын 3-нд Эрүүгийн хэргийн анхан шатны шүүхээр шүүсэн байна. Шүүхийн шийдвэрээр түүнийг нийтийн албанд томилогдох эрхийг таван жилээр хасаж, гурван жилийн ял оноосон байдаг. Харин Д.Сүндийгээс авлига авсан иргэнийг нийтийн албанд томилогдох эрхийг таван жилээр хасаж, 14 сая төгрөгөөр, Г.Даваажавыг нийтийн албанд томилогдох эрхийг таван жилээр хасаж, дөрвөн жилийн хорих ялаар, Т.Батсайханыг мөн эрхийг таван жилээр хасаж, дөрвөн жилийн хорих ял оноожээ. Энэ хэрэг прокурор руу буцсаар өдийг хүрсэн аж. Харин тэдний давж заалдах шатны шүүх хурал энэ сарын 8-нд болно.

   Эргэн сануулахад, Д.Сүндий 2019 оны гуравдугаар сарын 15-нд эхнэрээ зодож, гэмтэл учруулсан хэрэгт холбогдсон. Улмаар хэргээ хэрэгсэхгүй болгуулахаар цагдаа нарт авлига өгсөн байдаг. НПГ-аас түүнд Эрүүгийн хуулийн 22.5-2 дахь хэсэгт заасан “Өөртөө давуу байдал бий болгох зорилгоор бусдад албаны чиг үүрэг, бүрэн эрх, албан тушаалын байдалтай нь холбогдуулан эд зүйл өгсөн” хэргийг зохион байгуулж, хамтран оролцсон гэх үндэслэлээр яллах дүгнэлт үйлдсэн байдаг.