Тодорхой хугацааны давтамжтайгаар нэг удаад 100 литр усыг автомат халаагчаар халааж, иргэдэд түгээдэг худаг нийслэлийн Налайх дүүргийн I хороонд ажиллаж эхэлжээ. Өмнө нь ус түгээх худгуудад түгээгч суух шаардлагагүй буюу смарт цэнэглэгч картын систем нэвтрүүлж эхлээд байсан. Ингэснээр иргэд цагт баригдалгүйгээр өдөр, шөнийн алинд ч худгаас ус авах боломжтой болж байгаа. Тэгвэл энэ удаад ахуйн хэрэгцээний халуун усыг гэрийнхээ ойролцоох худгаас авах боломж бий болжээ. 

            Халуун ус түгээдэг худгийг санаачилсан монгол залуу инженерүүдийн төлөөлөл “SEM” /Systems Enjineering Mongolia/ компанийн гүйцэтгэх захирал Г.Тулга “Бидний ажил Улаанбаатар хотын гэр хороололд амьдардаг 220 мянган өрхийн халуун, хүйтэн усны дэд бүтэц, бохирын шугамыг шийдэх эхний бодит алхам болно гэж харж байгаа. Нийслэлийн иргэдийн шүдний өвчин болсон агаар, хөрсний бохирдол, гэр хорооллын дэд  бүтцийг шийдэхэд эхний ээлжинд хувь нэмрээ оруулсан шийдэл юм” гэсэн юм.  Харин Байгаль орчин аялал жуулчлалын сайд Б.Бат-Эрдэнэ “Инженерүүдээ бүрэн дэмжиж ажиллана. Гэр хорооллын тулгамдсан нэг асуудал нь халуун усны асуудал байдаг. Монгол инженерүүд шийдэл гаргаж худгаас халуун ус авах боломжийг бүрдүүлжээ. Налайх дүүрэгт анхны худаг ажиллаж эхэлсэн бөгөөд Нийслэл, Эрдэнэт, Дархан гэсэн томоохон хотуудад нэн тэргүүнд нэвтрүүлж, цаашлаад улсын хэмжээнд нэвтрэх боломжтой төсөл гэж харагдаж байна. Хэрэглэгчид бүхий л сонголтыг өгөх хэрэгтэй” хэмээн албан ёсны цахим хуудастаа мэдээлсэн байна.