Монголчууд оны эх, сарын тэргүүн, өдрийн эртэд бүхий л ёс, ёслолынхоо өмнө мөнх хөх тэнгэртээ мөргөн золгодог уламжлалтай. Энэ ч утгаар хаврын тэргүүн сарын шинийн нэгний өглөө мөнх хөх тэнгэртээ мөргөх нь хаврын баярын хамгийн тэргүүний ёслол. Өөрөөр хэлбэл, нар мандан гарахтай зэрэгцээд тэнгэр мөргөх ёслол үйлдэнэ. Ингэхдээ цагаан эсгий, гудас дэвсээд тэнгэр хангайдаа дээжээ өргөн, мөргөх ёслол эхэлнэ.

   Зүүнээс цагаан гэгээ цуварч, үүр тэмдгэрэх үед гэрийн эзэн тэргүүлэн тавагтай цагаан идээ, ууц, архи, цай зэргээс дээж өргөх бөгөөд дөрвөн зүг, найман зовхист хандан тэнгэрт цацал, цацна. Өргөл цацлын дараа галыг нар зөв тойрон, дэссэн эсгий дээр гэрийн эзэн сөгдөн, тэнгэрт гурав, гурав ёс мөргөдөг. Мөн Монголчууд хаврын тэргүүн сарын шинийн нэгний нарнаас тухайн жилийн өнгийг шинждэг уламжлалтай. Мөн анхны нарыг харсан хэн бүхэнд ирж буй цаг гэрэл гэгээтэй байж, санасан бүхэн сэтгэгчлэн бүтнэ хэмээн бэлэгшээдэг.