Худалдааны төвөөс аарц худалдан авч, буцалгаж уугаад гүн хордлогод орж, эмнэлэгт хүргэгджээ.

Тодруулбал, худалдааны төвөөс авсан аарц буцалгаж уугаад нэг гэр бүлийн 8-77 насны гурван хүн гүн хордлогод орж, Цэргийн төв эмнэлэгт хүргэгдсэн байна. Үүнтэй холбоотойгоор Хан-Уул дүүрэг дэх цагдаагийн II хэлтэс шалгалтын ажиллагаа явуулж, хэргийн газраас аарц, элсэн чихэр зэрэг бүтээгдэхүүнийг хураан авч, шинжилгээ хийхээр явуулжээ. Эх сурвалжийн мэдээлснээр иргэдийн худалдааны төвөөс худалдан авсан аарцнаас мөнгөн ус илэрсэн аж. Одоогийн байдлаар холбогдох байгууллагаас иргэдийн хордсон аарцны гарал үүслийг тогтоож, тухайн бодис хэрхэн хүнсний зүйлд орсныг нарийвчлан шалгаж байна.

            Мөнгөн ус нь хүнсний зүйлээр дамжин хоол боловсруулах замд нэвтэрснээр амны хөндийн салст, улаан хоолой, ходоод, гэдсийг түлж, үрэвсүүлдэг. Хэрэв хордсон бол огиулж бөөлжих, дотор муухайран аманд зэв төмөр амтагдаж, түлэгдсэн газрууд хүрэн улаан өнгөтэй болох бөгөөд мөнгөн ус дамжсан газар бүрд хөндүүрлэн хорсох мэт өвдөж, цустай бөөлжих, гүйлгэх байдлаар даамжирдаг. Тиймээс дээрх шинж тэмдэг илэрсэн тохиолдолд яаралтай эрчимт болон саармагжуулах эмчилгээ хийхгүй бол хүндэрч бөөрний дутагдал, цус багадалт, гүн хордлогод орох өндөр эрсдэлтэй юм.

            Иймд иргэд, сар шинийн баярын энэ өдрүүдэд иргэд задгай зах, талбайгаас хүнсний бүтээгдэхүүн худалдан авахдаа гарал үүслийн бичгийг шалгах, чанар, аюулгүй байдлыг харгалзан үзэж, хаана, хэзээ үйлдвэрлэсэн нь тодорхой, чанарын баталгаажилттай бүтээгдэхүүн сонгон хэрэглэхийг мэргэжлийн байгууллагаас анхааруулж байна.