Монголын өмгөөлөгчдийн холбооны ерөнхийлөгч Б.Оюу-Эрдэнэ, МҮХАҮТ-ын дэргэдэх Монголын олон улсын арбитрын дарга С.Энхцэцэг нар өнөөдөр хамтран ажиллах санамж бичигт гарын үсэг зуржээ. Мөн тус арга хэмжээнд Монголын Өмгөөлөгчдийн Холбооны дэд ерөнхийлөгч М.Баасанбат, Монголын Олон Улсын Арбитрын ерөнхий нарийн бичгийн дарга М.Шинэбаяр нар оролцов.

            Санамж бичгийн хүрээнд хамтын ажиллагааг хөгжүүлэх, боловсрол, сургалт, сурталчилгааны чиглэлээр хуульч, өмгөөлөгчдөд эрх зүйн маргааныг арбитрын журмаар шийдвэрлэх ажиллагааны онцлог, ач холбогдлын талаар сургалт, хэлэлцүүлэг зохион байгуулах, Арбитраас зохион байгуулж буй сургалт, хэлэлцүүлэг, бизнес уулзалтад Холбооны гишүүдийн өмгөөлөгчдийг хамруулах, Тасралтгүй боловсролыг түгээх төрөл бүрийн арга хэмжээ (олон улсын түвшний хурал, форум, хэлэлцүүлэг), түргэвчилсэн, вакум семинарууд, туршлага судлах аялал зэрэг үйл ажиллагааг зохион байгуулах зэрэг олон талт харилцааг өргөжүүлэхээр болов.

Хамтран ажиллах санамж бичиг байгуулснаар өмгөөлөгчдийн мэдлэг боловсролыг дээшлүүлэх сургалтад хамруулах, хамтын ажиллагааны хүрээнд мэдээлэл солилцох ажлыг түргэн шуурхай зохион байгуулж, хэрэгжүүлэх боломжтой болж байна.

 Эх сурвалж: Монголын өмгөөлөгчдийн холбоо