Нийслэлийн Баянгол дүүргийн 18 дугаар хорооны нутаг дэвсгэрт өчигдөр эвдэрхий лифтний хаалгаар гурван настай хүүхэд унаж, амиа алдсан осол гарсан. Тэгвэл тус осолтой холбоотойгоор “Улаанбаатар лифт” ОНӨААТҮГ-ын дарга Д.Ган-Эрдэнэ мэдээлэл хийлээ.

          Тэрбээр “Барилга, хот байгуулалтын яам, НМХГ-ын зөвшөөрлөөр орон сууц, өмчлөлд шалгалт хийдэг. Манай “Улаанбаатар лифт” ОНӨААТҮГ үзлэг хийх эрхгүй болохоор осол гарсан газар очиж шалгаж чадаагүй байна. Харин энэ тохиолдолд Лифтний аюулгүй ажиллагаа дүрэм, Орон сууцны дундын өмчлөлийн гэрээнд тухайн СӨХ хариуцлага хүлээх тухай заасан байдаг.

          Улаанбаатар хотын хэмжээнд нийт 7000 гаруй лифт байдаг гэсэн судалгаа бий. Үүнээс 134 лифт эвдрэл, гэмтэлтэй буюу зайлшгүй солих шаардлагатай байгаа. Зайлшгүй солих шаардлагатай лифт нь ихэвчлэн хуучны барилгуудынх байна. Тиймээс дээр дурдсан 134 лифтийг сольж, шинэ лифт хавих төсөл хэрэгжүүлээд ажиллаж байгаа” гэсэн юм.