Баянгол дүүргийн 18 дугаар хорооны 86 дугаар байрны долоон давхрын лифтнээс гурван настай хүүхэд унаж, амиа алдсан харамсалтай хэрэг гарсан. Учир нь, тус байрны лифт 3-4 жилийн өмнө эвдэрсэн байсан ч СӨХ-ийнхөн засаж янзлаагүй улмаас хүүхдийн амь эрсэдсэн хэмээн үзэж байгаа. Харин тус байрны лифтийг МХЕГ-аас акталж, анхааруулга өгсөн эсэх талаар МХЕГ-ын улсын ахлах байцаагч Г.Эрдэнэхүүгээс тодрууллаа.

     Тэрбээр “МХЕГ-аас төлөвлөгөөт болон төлөвлөгөөт бус, урьдчилан сэргийлэх хяналт, шалгалт хийдэг. Тус байрны лифтийг 2018 онд эвдрэл гэмтэлтэй гэдгийг тогтоож, СӨХ-д мэдэгдсэн. Үүнээс хойш тус байрны лифтийг засаагүй учир 2019 онд гацаж зогссон байсан. Тиймээс “Тус лифтийг солиход санхүүжилт хэрэгтэй байна” гэх тодорхойлох албан бичиг 2021 онд МХЕГ-т ирсэн. Манайх тус албан бичгийн дагуу 2021 оны дөрөвдүгээр сарын 9-нд байрны лифтийг акталж, СӨХ-д мэдэгдсэн. Гэвч СӨХ техникийн бүрэн бүтэн байдал, аюулгүй байдлыг хангаж, "Эвдэрсэн лифтээр зорчиж болохгүй" гэх анхааруулах тэмдэг тавьж, аюулгүй болгох байсан. Үүнд огт анхаарч ажиллахгүй. Хэнтэй, хэрхэн яаж ажиллах нь СӨХ-ын асуудал шүү дээ.  МХЕГ 2021 онд лифттэй холбоотой 64 өргөдөл, 500 албан бичиг хүлээн авч шийдвэрлэсэн байна” гэлээ.