Баянгол дүүргийн 18 дугаар хорооны 86 байрны долоон давхрын лифтнээс гурван настай хүүхэд унаж, амиа алдсан харамсалтай хэрэг гарлаа. Тус байрны лифт нь эвдэрч, гурван жил ажиллаагүй бөгөөд оршин суугчид шатаар зорчдог байжээ. Иргэд удаа дараа СӨХ-доо гомдол гаргаж, лифтээ ашиглалт оруулахыг шаардсан ч үр дүнд хүрээгүй байна. Тус байр нь ашиглалтад ороод 10 жил болсон бөгөөд өнгөрсөн жил лифтийг акталж, солихоор болсон байна. Хүүгийн эндсэн лифт эвдрээд олон жил болж байхад яагаад засварлаагүй талаар 18 дугаар хорооны Засаг дарга н.Ганзоригоос тодрууллаа.

     Тэрбээр “86 дугаар байрны лифтийг 2019 оноос хойш засварлахаар 45 сая төгрөгийн төсөв батлуулж, хоёр удаа тендерт зарласан. Гэвч өнгөрсөн хугацаанд цар тахалтай байсан учир лифт засварлах компани олдоогүй. Харин энэ жил төсвөө нэмж батлуулаад, тендер зарлаж засаж янзлахаар ажиллаж байна” гэлээ.