УИХ-ын намрын чуулган энэ сарын 18-нд хаалтаа хийсэн. Тус хуралдаанаар Инноваци цахим бодлогын байнгын хорооныхон ямар хуулийн төсөл боловсруулж, хэрхэн батлуулсан талаар тус байнгын хорооны дарга Н.Учрал танилцууллаа. Тэрбээр “Манай хороо найман удаа хуралдаж чуулганы нэгдсэн хуралдаанд таван хууль бэлтгэж, хуралдаанаар батлуулсан. Тус хуулийн төслүүд батлагдсанаар төрийн цахим, аж үйлдвэрийн дөрөвдүгээр хувьсгал хувьсан өөрчлөгдөж байгаа цаг үед хөл нийлүүлэн алхах эрхзүйн орчинг бүрдүүлж өгсөн. Өнгөрсөн хугацаанд цахим бодлогын түр хороог байгуулж ажилласан. Тус цахим бодлогын түр хороо харилцаа холбоо, радио долгион, шуудангийн хууль гэх харилцаа холбооны үндсэн суурь хуулиудын хэрэгжилтийг хангуулах, нийгэмд хандсан нөлөөллийн аян эхлүүлэх тодорхой ажлуудыг санаачилж хийсэн. УИХ, ЗГ-т төрийн цахим шилжилтийг хийх хүрээнд ЗГ-т гурван удаа тогтоолоор чиглэл өгсөн. Тус чиглэлийг үндэслэж, хууль тогтоомж боловсронгуй болгох, иргэдтэйгээ хамтарч боловсруулах бие даасан палатформыг иргэдэд танилцуулсан. 2020 он шинэ парламентэд цахим бодлогын байнгын хороог байгуулж ажилласан” гэв.