Сүхбаатар дүүргийн зургадугаар хороонд зам тээврийн осол гарсан гэх дуудлага, мэдээлэл өнөөдөр 09:50 цагт цагдаагийн байгууллагад бүртгэгдсэн байна. Дуудлагын дагуу Сүхбаатар дүүргийн замын цагдаагийн хэлтсийн алба хаагчид хэргийн газрыг хамгаалж, хэргийг газрын үзлэгийг хийж дууссан байна.  Энэ талаар Тээврийн цагдаагийн албаны Урьдчилан сэргийлэх хэлтсийн ахлах мэргэжилтэн цагдаагийн ахмад Г.Отгонтамир мэдээлэл өглөө. Тэрбээр “Тухайн осолд нийтийн тээврийн гурван автобус, суудлын гурван автомашин холбогдсон. Урьдчилсан байдлаар яаралтай түргэн тусламжийн 103 ГССҮТ-ийн  эмнэлэг рүү зургаан иргэнийг хүргэсэн. Ослыг гарах шалтгаан нөхцөлийг хараахан хэлэх болоогүй, шалгалтыг үргэлжлүүлж байна. Автобусны жолоочийн хөдөлмөр горимын амралт, замын хөдөлгөөний дүрэм зөрчсөн эсэх, замын камеруудыг шалгана. Мөн техникийн шинжээч томилж, техникийн бүрэн бүтэн байдлыг тогтоож, аж ахуйн нэгжид очиж жолооч нарын амралтын горимыг хэрхэн зохицуулж байгаа талаар шалгалт явуулна.  Хэрэг бүртгэл мөрдөн байцаалт дууссаны дараа Прокурорын байгууллагаас албан ёсны зөвшөөрөл авч, мэдээлэл өгнө” гэлээ.