ХӨСҮТ-ийн ерөнхий захирал Ц.Билэгтсайхан мэдээлэл өглөө.

Тэрбээр “Сүүлийн өдрүүдэд халдвар авах хүмүүсийн тоо эрс нэмэгдэж байна. Тохиолдлын тоо, хувийг илрүүлэх гол үзүүлэлт нь PCR шинжилгээ. Оны өмнө энэхүү хувь нь 4-5 хувь байсан бол одоо 20 хувь буюу дөрөв дахин нэмэгдсэн байна. ХӨСҮТ-д хэрэгжүүлж байгаа хариу арга хэмжээнд өөрчлөлт орсон. Бид арваннэгдүгээр сарын сүүлч, арванхоёрдугаар сард илүү эрсдэлд суурилсан хариу арга хэмжээ буюу хилийн тандалт, шинжилгээ, тусгаарлан ажиглах байрнаас давтан шинжилгээ зөөвөрлөгдсөн тохиолдол илүүтэйгээр илрүүлэх шинжилгээ авч байсан. Тэгвэл бидний хэрэгжүүлэх байгаа хариу арга хэмжээ өөрчлөгдөж, дотоодын халдвар ихэссэнтэй холбоотойгоор илүү эрсдэл бүхий хүн амд чиглэсэн тандалтын хариу арга хэмжээг илүүтэй авч хэрэгжүүлж байна.

  Өдөрт илрэх эерэг тохиолдлын тандалтын хариу арга хэмжээг авч хэрэгжүүлэхэд нийт хүн амын 80 хувь нь  ажлын газар болон гэр бүлээсээ халдвар авч байна. Мөн сүүлийн тав хоног үйлчлүүлсэн газрыг тандаж үзэхэд, дэлгүүр, эрүүл мэндийн байгууллага, эмийн сан, томоохон худалдааны төвөөр үйлчлүүлэхдээ хүмүүс халдвар авах нь их байна. Учир нь олон нийтийн газраар үйлчлүүлэх явцдаа 60 гаруй хувь нь ойрын хавьтал болсон гэсэн судалгаа бий. Иймээс иргэд үйлчилгээний газраар үйлчлүүлэхдээ халдвар хамгааллын дэглэмээ сайтар мөрдөж, Эрүүл мэндийн яамнаас өгсөн зөвлөмжийн дагуу стандарт, шаардлага хангасан амны хаалтаа зүүхийг анхааруулж байна” гэв.