Мэргэжлийн хяналтын ерөнхий газрын дарга Т.Гантулга ШӨХТГ-ын даргаар томилогдох гэж байгаатай холбоотойгоор МХЕГ-т ажилласан хоёр жил гаруйн хугацаанд хийж хэрэгжүүлсэн ажлынхаа талаар сэтгүүлчдэд мэдээлэл өглөө.

  Тэрбээр "Ажиллах хугацаандаа гурван зорилт тавьж ажилласан. Нэгдүгээрт, Мэргэжлийн хяналтын харилцааг зохицуулж байгаа төрийн хяналтын тухай хуулинд шинэчилсэн найруулга хийсэн. Хоёрдугаарт, Мэргэжлийн хяналтын газрыг нэн яаралтайгаар цахимжуулах буюу дижитал хэрэгжилтийг хийсэн. Ингэхдээ хэрэглэгч, аж ахуйн нэгж, төрийн гэсэн гурвалсан хяналтыг оруулж ирэхээр ажилласан. Өөрөөр хэлбэл, хэрэглэгч өөрөө мэргэжлийн хяналтын үйл ажиллагаанд оролцох боломжийг бүрдүүлсэн. Гуравдугаарт, Мэргэжлийн хяналтын газрын дотор байгаа нийгмийн асуудлын хүрээнд өөрийн гэсэн барилга байшинтай, сургалт, судалгааны төв,  лавлагаа лабораторитой болохоор зорилт тавьсан. Хоёр жил ажиллах хугацаандаа ийм гурван үндсэн чиглэлээр ажилласан. Мөн хуучин хилийн хорио цээр байсан албыг хилийн мэргэжлийн алба болгосон" гэв.