Зэвсэгт хүчний Жанжин штабын Удирдлагын шуурхай бүлэг болон салбарын хэмжээнд "Ковид-19"-ийн шинэ төрлийн омикрон хувилбараас урьдчилан сэргийлэх талаар авч хэрэгжүүлж буй үйл ажиллагаатай танилцах хуралд Батлан хамгаалахын Ерөнхий хянан шалгагч бригадын генерал Ж.Болдбаатар оролцон санал хүсэлтээ илэрхийлж, тодорхой үүрэг чиглэлийг өгч ажиллажээ.

           Тус хурлаар ЗХЖШ-ын Ажиллагааны удирдалгын газрын Ажиллагааны удирдлага, төлөвлөлтийн хэлтсийн ахлах мэргэжилтэн дэд хурандаа П.Мөнх-Эрдэнэ Удирдлагын шуурхай бүлгийн талаар, Эрүүл мэндийн хэлтсийн мэргэжилтэн дэд хурандаа Э.Бямбадорж Зэвсэгт хүчний хэмжээнд, Цэргийн төв эмнэлгийн дарга, ерөнхий эмч хурандаа Б.Энх-Од Цэтгийн төв эмнэлгийн, Нийслэлийн ЗДТГ-ын Цэргийн штабын дарга хурандаа Г.Ялалт нийслэлийн хэмжээн дэх цэргийн штабуудын "Ковид-19", омикрон хувилбарын эсрэг авч хэрэгжүүлж буй үйл ажиллагааны талаар танилцуулав.

           Энэ үеэр бригадын генерал Ж.Болдбаатар "Та бүхэнд дараах үүрэг чиглэлийг өгч байна. Нэгдүгээрт, шинэ он гарахтай зэрэгцээд омикроны халдвар ихэссэнтэй холбоотойгоор түүнээс урьдчилан сэргийлэх ажлыг зохион байгуулж уриалга гаргах, хэвлэл мэдээллийн хэрэгслээр анхааруулга, санал хүргэх ажлыг зохион байгуулах. Хоёрдугаарт, УОК-ын Шуурхай штабтай мэдээллээ түргэн хугацаанд шуурхай солилцож хамтран ажиллах.

           Гуравдугаарт, мэдээлэл, судалгааны ажлаа улам чамбайруулах шаардлага байна. Дөрөвдүгээрт, эмнэлгийн нэг удаагийн хамгаалах хэрэгслийн нөөцийг бүрдүүлэх тал дээр анхаарах. Тавдугаарт, хугацаат цэргийн алба хаагчдын халдвар хамгааллыг сахиулж, урьдчилан сэргийлэх, дархлаажуулалтын тал дээр тодорхой ажлуудын зохион байгуулах. Зургадугаарт, дархлаажуулалтын дөрөвдүгээр тунгийн ажлыг эрчимжүүлэх, долоодугаарт, сар шинийн баяраар золголт хийх нэрийдлээр хөдөө орон нутаг руу явах хөдөлгөөн ихэсдэг. Үүнтэй холбогдуулан алба хаагчийн хөдөө орон нутаг руу зорчих хөдөлгөөнийг аль болох хязгаарлахыг уриалж, зөвхөн гэр бүлийн хэмжээнд тэмдэглэн өнгөрүүлэх талаар анхааруулга, шторк, баннерыг байршуулах шаардлагатай. Наймдугаарт, Цэргийн төв эмнэлгийн хувьд шаардлагатай байгаа зүйлсээ БХЯ-нд албан бичгээр ирүүлээрэй гэсэн үүргийг өгч байна" гэв.