Иргэн М.Ган-Эрдэнэ аавынхаа хамтран амьдарч байсан эмэгтэйд мөнгө, эд хөрөнгөө алджээ. Өв нээгдэхээс өмнө хамтран амьдарч байсан эмэгтэй нь тэдний эд хөрөнгөд шунаж байгаад М.Ган-Эрдэнэ гомдолтой байгаа тухайгаа ярьсан юм.

-Та аавынхаа хамтран амьдарч байсан эмэгтэйд эд хөрөнгөө алдсан гэлээ. Юу болсон талаар  ярьж өгөөч?

     -Аав минь намайг долдугаар ангид байхад ээж бид хоёрыг орхиж, өөр эмэгтэйтэй хамт амьдарч  хоёр хүүхэдтэй болсон. Гэвч тэр эмэгтэй 1-2 насны хоёр хүүхдээ аавд үлдээгээд явсан. Тэр эмэгтэй хүүхдүүдээ орхиж явсан цагаас хойш аавтай болон хүүхдүүдтэйгээ огт холбоогүй байсан юм. Аав минь долдугаар сард нас барсан. Гэтэл хамтран амьдарч байсан эмэгтэй аавын ажил явдал дуусаагүй байхад манай байрыг хэний нэр дээр байдаг тухай асууж ирсэн. Тэгээд дүүгээр аавын банкны карт болон бусад бичиг баримт, ажлын түлхүүрийг  хулгай хийлгэж аваад 120 сая төгрөгөөр нь нөхөртэйгөө гадаадаар аялсан байна лээ. Аав бид хоёр арьсны дэлгүүр ажиллуулдаг байсан юм. Би аавын батлан даагч байсан болохоор өртэй үлдсэн.

-Одоо дэлгүүрээ ажиллуулж байгаа юу?

      -Одоо үйл ажиллагаа явуулахгүй байгаа. Тэр эмэгтэй 5-6 сар манай дэлгүүрийг ажиллуулж бүтээгдэхүүний үнэ мэдэхгүй байж дураараа зарж, борлуулсан байна лээ. Тэгээд олсон мөнгөөрөө өрийг нь төлөхгүй, хувьдаа завшаад байгаа юм. Цагдаагийн байгууллагад хандсан ч шуурхай арга хэмжээ авч чадахгүй удсан учраас би хүмүүстэй хамт очиж худалдагчийг нь гарахыг шаардаж, түлхүүрээ авсан.

-Та хоёр уулзаж, ойлголцох гэж үзсэн үү?

      -Бид хоёр уулзаж, ярилцсан ч тэр хэлсэндээ хүрээгүй. Надтай уулзсаныхаа маргааш нь Манай ажлын байрны харуул хамгаалалтын хүмүүст “30 сая төгрөг өгье” та нар наад ажлаа больчих. Наанаас чинь бараагаа зөөмөөр байна” гэж ярьсан байсан. Тэгэхээр нь би дэлгүүрт үлдсэн бараагаа авсан юм. Барааны 70-80 хувийг нь бөөний үнээр борлуулчихсан байсан. Тэгээд хэвлэл мэдээллийн хэрэгслээр хоёр дүүгийн нэрийг барьж, худлаа яриад байгаад харамсаж байна.

-Аавынх нь үхлийн учир шалтгаан юу байсан бэ. Задлан шинжилгээ хийлгэсэн үү?

     -Аав минь хоёр дүүтэй хамт амьдардаг байсан. Гэртээ байхдаа гэнэт нас барсан. Задлан шинжилгээний хариугаар “Гэнэтийн үхэл байна” гэж гарсан. Тийм болохоор бид гаднын нөлөөгүй гэж итгэж байгаа.  

-Хоёр дүү нь хэнээр овоглодог вэ. Хэзээ өв нээгдэх вэ?

     -Хоёр дүү аавын нэр дээр байдаг. Жилийн дараа өв нээгдэнэ. Гэтэл аавтай хамтран амьдарч байсан эмэгтэй өв нээгдэхээс өмнө бидний эд хөрөнгийг  үгүй хийх гээд байгаа юм. Өв нээгдэхээр бид гурав тэнцүү хуваах ёстой байтал дураараа дэлгүүр ажиллуулж, мөнгөөр нь аялж, зугаалчихаад хэвлэл мэдээллийн хэрэгслээр худлаа ярьж жүжиглээд байгааг нь хараад суух хэцүү байна. Тэр эмэгтэй бөө гэсэн. Түүгээрээ намайг айлган сүрдүүлж, миний зургийг олон нийтийн сүлжээнд байршуулж, үг хэлээр доромжилдог.

-Та хэзээ цагдаад хандсан бэ?

    -Наймдугаар сард цагдаад мэдэгдсэн. Бидний асуудал хэзээ эцэслэн шийдэгдэх талаар мэдэхгүй байна.