Баянзүрх дүүргийн 22 дугаар хороонд байрлах “Энэрэл” эмнэлгийн эмч, сувилагч нар хоёр настай хүүхдэд хугацаа нь дууссан тариа тарьсан гэх мэдээлэл олон нийтийн сүлжээгээр цацагдсан. Энэ талаар Тус эмнэлгийн эмчилгээ эрхэлсэн дарга Г.Одончимэгээс тодрууллаа. Тэрбээр “Манай эмнэлгийн эмч нярай хүүхдэд хугацаа нь дууссан цагийн тариа тарьсан нь үнэн. Чанарын албанаас хяналт, шалгалт хийж, шалтгаан нөхцөлийг нь тодорхой болгохоор ажиллаж байгаа. Шалгалтын үеэр улаан бүсийн нөөцөд ашиглаж байсан эм тариаг эмийн сан руу нэгтгэж оруулахдаа хугацаа нь дуусан 4-5 тариаг андуурч хайрцагт хийсэн алдаа гарсан байна. Хугацаа нь дууссан тарианы хоёрыг нь хүүхдэд тарьсан гэх урьдчилсан мэдээлэл бий.  Хугацаа нь дууссан тариа хэрэглэсэн тохиолдолд сөрөг нөлөө үзүүлэх эсэх талаар судалж байна. Судалгаанаас харахад, хугацаа нь дууссан антибиотикийн үйлчлэх нөлөө нь 10 хувиар буурч, өвчтөнд ямар нэгэн хор нөлөө үзүүлдэггүй юм байна. Гэвч манай эмнэлгийн эмч, ажилчид гаргаж болохгүй алдаа хийсэн учраас ажилчдад холбогдох арга хэмжээг авч байна. Тухайлбал, хугацаа нь дууссан тариа тарьж, ээлжид ажиллаж байсан сувилагч, эм зүйч нарт тушаалын арга хэмжээ авсан. Цаашид дахин эрсдэл гаргахгүй байхад анхаарч, сургалт зохион байгуулж, ажилчдадаа хариуцлагатай байхыг анхааруулсан. Хугацаа нь дууссан тариагаар тариулсан хүүхдийн биеийн байдал сайн байгаа. Манай эмнэлгийн эмч ээжтэй нь байнга холбоотой байна” гэв.