Монгол хүний удмын сангийн аюулгүй байдлыг хамгаалах, хүн амын өсөлтийг дэмжих талаар авах арга хэмжээний тухай УИХ-ын тогтоолын төсөлд зургаа болон түүнээс дээш хүүхэдтэй гэр бүлийн орон сууцны урьдчилгааг төрөөс даах эрх зүйн орчинг бүрдүүлнэ гэж тусгасан. Харин энэ талаар УИХ-ын гишүүн Ж.Чинбүрэн “Монгол хүний удмын сангийн аюулгүй байдлыг хамгаалах чухал тогтоол бий. “Зургаа болон түүнээс дээш хүүхэдтэй гэр бүлд орон сууцны урьдчилгааг төрөөс даана” гэх заалтыг хассан. Гишүүд хүн амын өсөлтийг дэмжихдээ тооноос илүү чанарт анхаарах хэрэгтэй гэж үзсэн. Хэрвээ тус заалтыг хэвээр үлдээх юм бол тухайн гэр бүл олон хүүхэдтэй болохыг эрмэлзэж, хүүхдийн хувь заяанд сөргөөр нөлөөлөх эрсдэлтэй гэж үзсэн. Тэгэхээр Засгийн газар судалгаагаа сайн хийх хэрэгтэй. Өнгөрсөн 30 жилд ургийн бичиг хөтлөх, цус ойртолтоос сэргийлж, уриалга гаргахаар ярилцаж байсан. Гэсэн ч ажил хэрэг болж чадаагүй. Судалгаанд хамрагдсан иргэдийн 80-аас дээш хувь нь “Ургийн бичиг хөтөлдөггүй” гэж хариулсан.Тогтоолын төслийн долдугаар заалтад “Хүн амын өсөлт нөхөн үржихүй гэр бүлийн тогтвортой байдлыг дэмжих зорилгоор жирэмсэн эмэгтэй, эх хүүхдэд үзүүлэх эмнэлгийн үйлчилгээ, асаргаа сувилгаа, сургалтын чанар хөтөлбөрийг сайжруулах хүүхдийн тооноос хамруулан гэр бүлд дэмжлэг үзүүлэх” гэж өөрчилсөн. Харин бодитой ямар дэмжлэг үзүүлэх ёстой вэ гэдгийг Засгийн газраас эцэслэн шийдвэрлэнэ" гэлээ.