Өмнөговь аймгийн Цогтцэций сумын Иргэдийн төлөөлөгчдийн хурлын тогтоолоор “Дархан бэр” тэмдэг олгох тухай журмыг шинэчлэн баталсан байна. Тодруулбал, “Анх бэр болж очсон айлдаа гурваас дээш хүү дараалан төрүүлж өсгөсөн бөгөөд бага хүү нь нэг нас хүрсэн байх. Мөн охин төрүүлсэн бол тооцохгүй” гэж шаарджээ. Тус сумын ИТХ-аас гаргасан журмыг иргэд шүүмжилж,  “Хүний эрх зөрчсөн, хүйсээр ялгаварлан гадуурхсан” хэмээж байгаа юм. Тус журмыг хэрхэн баталсан талаар Цогтцэций сумын Иргэдийн төлөөлөгчдийн хурлын дарга Ц.Доржсүрэнгээс тодрууллаа.

     Тэрбээр “Манай улс “Дархан бэр”-ийг тодорхойлж  энгэрийн тэмдэг олгоод 10-аад жил болж байна. Манай сум энэ жил тус журмыг шинэчлэн баталсан нь үнэн. Ингэхдээ иргэдийн санал, хүсэлтийн дагуу тус журмыг баталж, хэрэгжүүлэхээр болсон. Гэхдээ  өнөөдөр аймгийн мэргэжилтэн холбогдож "ХЭҮК-ын тухай хуулийн 27 дугаар зүйлийн 27.2 дахь хэсэгт заасан Комиссын гишүүний бүрэн эрхийн хүрээнд шаардлага хүргүүлнэ" гэдгээ амаар мэдэгдсэн. Тиймээс “Дархан бэр” тэмдэг олгох журам өөрчлөгдөж, хүчингүй болно” гэв.