Цагдаагийн алба хаагчид бусдыг эрүүдэн шүүж, эзэнгүй хэрэг тохож, нотлох бичиг баримтыг хуурамчаар үйлдсэн хэрэгт холбогдох шүүх хурал өнөөдөр болж, шийдвэрээ танилцууллаа. Тэгвэл шүүхээс уг хэрэгт холбогдох цагдаагийн алба хаагч Ч, Б, Г нарт Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхээс торгууль ногдуулсан байна.

Шүүгдэгч Ч, Б, Г нарыг ЭХТА-ийн 21.12 дугаар зүйлийн 1 дэх хэсэгт заасан гэмт хэрэг үйлдсэн гэм буруутайд тооцож, шүүгдэгч тус бүрийг 10 сая төгрөгийн торгох ялаар, шүүгдэгч Ч, Б, Г нарыг ЭХТА-ийн 21.1 дүгээр  зүйлийн  2 дахь хэсэгт заасан гэмт хэрэг үйлдсэн гэм буруутайд тооцож, Г-г 7.5 сая төгрөгөөр торгох ялаар, шүүгдэгч Ч, Б нарт тус бүрт нь 6.5 сая төгрөгөөр торгох ял ногдуулж, шүүгдэгч Г-г нийт 17.5 сая төгрөгөөр, Ч, Б нарыг нийт 16.5 сая төгрөгөөр торгох ялаар тус тус шийтгэж шийдвэрлэжээ.

          Хэргийг эргэн сануулбал, Сүхбаатар дүүргийн цагдаагийн ... хэлтсийн алба хаагч Ч, Б, Г нар 2019 оны аравдугаар сарын 24-25-нд шилжих шөнө иргэн Д-г баривчилж, цагдаагийн хэсэгтээ аваачин эрүүдэн шүүж, байцаасан хэрэг гарсан. Мөн цагдаагийн алба хаагчдад холбогдох хэргийг шалгалтын ажиллагаагаар иргэн Д-д Сүхтбаатар дүүргийн нутаг дэвсгэрт гарсан 15 эзэнгүй хэргийг тохож, нотлох бичиг баримтыг хуурамчаар үйлдсэн болохыг нь тогтоосон байдаг.